১৭০০কোটি টকাৰ দলং পলকতে ভাংগি পৰিল গংগা নদীত ; এইয়াই নেকি ‘ড্ৰীম প্ৰজেক্ট’ বিহাৰ চৰকাৰৰ?

ডিজিটেল ডেস্কঃ বিহাৰৰ ভাগলপুৰ জিলাত নৱনিৰ্মিত গংগা নদীৰ ৯ নং ঘাটৰ চুলতাংগঞ্জ-আগুৱনী চাৰিলেনযুক্ত দলং পুনৰ ভাঙি পৰিছে। ঘটনাৰ পিছতে বিহাৰ চৰকাৰৰ এই অভিলাষী প্ৰকল্পটো পুনৰ প্ৰশ্নৰ আওতালৈ আহিছে, কাৰণ কোম্পানীটোৱে আগন্তুক কেইমাহমানৰ ভিতৰত দলংখন আৰম্ভ কৰাৰ দাবী কৰিছিল। এনে পৰিস্থিতিত যদি এই দলংখন কাৰ্যক্ষম হৈ উঠিলহেঁতেন তেন্তে কিমান ডাঙৰ দুৰ্ঘটনা সংঘটিত হ’লহেঁতেন। এই কথা কল্পনা কৰাটোও টান।

আচলতে এই দলংখন ৰাতিপুৱা প্ৰায় ৭:১৫ বজাত ভাগি নদীত পৰিল। কিছু মুহূৰ্তৰ ভিতৰতে কোটি কোটি টকা ব্যয় কৰি নিৰ্মাণ হৈ থকা দলংখন পুনৰ গংগা নদীত পৰিল । চাৰিলেনযুক্ত এই দলংখন পুনৰ ভাগি পৰাৰ লগে লগে নীতিশ চৰকাৰে বছৰ বছৰ ধৰি কৰি অহা উন্নয়নমূলক দাবীৰ ওপৰত পুনৰ প্ৰশ্ন উত্থাপন হৈছে।

ইয়াত তৃতীয়বাৰৰ বাবে এই ঘটনা সংঘটিত হৈছে। প্ৰথমটো কাণ্ড সংঘটিত হৈছিল ২০২২ চনৰ ৩০ এপ্ৰিলৰ পুৱাৰ ভাগত ৪ আৰু ৬ নং সংযোগী প্ৰায় ৩৬টা খণ্ড বতাহৰ ধুমুহাত ভাগি যায়। তাৰ পিছত দ্বিতীয়বাৰৰ বাবে ২০২৩ চনৰ ৫ জুন তাৰিখে সন্ধিয়া প্ৰায় ৬ বজাত ১১,১২,১৩ নম্বৰৰ সংযোগী কেইবাটাও খণ্ড নদীত ভাগি পৰি যায়। তিনি বছৰত এয়া তৃতীয়টো ঘটনা। শনিবাৰে তৃতীয়বাৰৰ বাবে ৯ নম্বৰ ছুপাৰ ষ্ট্ৰাকচাৰটো আকৌ এবাৰ নদীত ভাগি পৰিল।

উল্লেখ্য যে এছ পি সিংলা কনষ্ট্ৰাকচন কোম্পানীয়ে ১৭৫০ কোটি টকা ব্যয়ৰে চুলতাংগঞ্জ-আগুৱনীৰ মাজৰ গংগা নদীত এই দলংখন নিৰ্মাণ কৰি আছে। কোম্পানীটোৱে কয় যে অহা বছৰৰ ভিতৰত দলংখন কাৰ্যকৰী কৰিব। কিন্তু এতিয়া দলংখন ভাগি পৰা ঘটনাই কোম্পানীটোৰ নিৰ্মাণ কাৰ্যক লৈ প্ৰশ্ন উত্থাপন কৰিছে। এতিয়া দলং নিৰ্মাণ নিগমে এই বিষয়ত স্পষ্টীকৰণ দিছে, ‘যিটো গাঁথনি ভাগি পৰিছিল সেয়া পূৰ্বৰ ক্ষতিগ্ৰস্ত অংশৰ এটা অংশ আছিল।’ প্ৰত্যেকটো অংশ আঁতৰাই নিয়াৰ নিৰ্দেশনা দিয়া হ’ল।আঁতৰোৱাৰ সময়ত ক্ষতিগ্ৰস্ত অংশটোৰ এটা অংশ সৰি পৰে। নিগমে কয় যে গংগাত জলপৃষ্ঠ বৃদ্ধি আৰু প্ৰবল প্ৰবাহৰ বাবে এটা অংশ সৰি পৰে। ইয়াত কোনো নতুন কাম কৰা হোৱা নাছিল। ২০২৩ চনত ক্ষতিগ্ৰস্ত হোৱা আগৱনী দলঙৰ গোচৰটো আই আই টি ৰূৰকিৰ দলে তদন্ত কৰিছিল।