দেশত প্রচলন ২৪৫বিধ নকল ঔষধ

ডিজিটেল ডেস্ক : ভাৰতৰ প্ৰতি দুজন ব্যক্তিৰ এজন এটা নহয় এটা ৰোগত ভুগি আছে। এনে অৱস্থাত এই ৰুগীয়া লোকসকলৰ প্রধান ভৰসা হ'ল ঔষধ, কিন্তু দেশৰ একাংশ ঔষধ কোম্পানীয়ে এতিয়া ৰোগীৰ জীৱনক লৈ হেতালি খেলা পৰিলক্ষিত হৈছে।

কেইদিনমানৰ আগতে ইন্জেকশ্যনৰ বটলত পানী থকা আৰু ১৮৫বিধ ঔষধ নকল অথবা নিম্ন মানৰ বুলি প্ৰকাশ পোৱাৰ সময়তে শেহতীয়াকৈ সংসদত এই সম্পৰ্কত দাখিল কৰা তথ্যই চাঞ্চল্যৰ সৃষ্টি কৰিছে।

কেন্দ্ৰীয় স্বাস্থ্য মন্ত্ৰী জে পি নড্ডাই ৰাজ্য সভাক জনোৱা মতে যোৱা এবছৰত সমগ্ৰ দেশতে ঔষধৰ ১,১৬,৩২৩টা নমুনা পৰীক্ষা কৰা হৈছিল। যোৱা বছৰ এপ্ৰিলৰ পৰা চলিত বছৰৰ মাৰ্চলৈকে এই ঔষধৰ নমুনাসমূহ পৰীক্ষা কৰা হৈছিল। ইয়াৰ ভিতৰত ৩১০৪ বিধ ঔষধ নিৰ্ধাৰিত মানৰ নহয় বুলি তথ্য লাভ কৰা হয়। আন কথাত এই ঔষধসমূহ সেৱন কৰাৰ উপযুক্ত নহয়। ইয়াৰ লগতে ২৪৫ বিধ ঔষধ নকল বুলি পৰীক্ষাত ধৰা পৰে। নড্ডাই জনোৱা মতে এই সময়ছোৱাত নকল আৰু ভেজাল ঔষধ প্ৰস্তুত কৰাৰ বিৰুদ্ধে ৯৬১টা গোচৰ ৰুজু কৰা হৈছে।

আনহাতে, ২০২৩ চনৰ এপ্ৰিলৰ পৰা ২০২৪ চনৰ মাৰ্চলৈকে ১০৬১৫ বিধ ঔষধৰ নমুনা পৰীক্ষা কৰা হৈছিল। ইয়াৰ ভিতৰত ২,৯৮৮ বিধ ঔষধ নিৰ্ধাৰিত মানৰ নাছিল আৰু আন ২৮২ বিধ নকল ঔষধ ধৰা পৰিছিল। উল্লেখযোগ্য যে চেন্ট্রেল ড্রাগ ষ্টেণ্ডার্ড কন্ট্রল অর্গেনাইজেশ্যনৰ অধীনত এই নমুনাসমূহ পৰীক্ষা কৰা হয়। পৰীক্ষাৰ ফল অনুকূল নাপালে লগে লগে বজাৰৰ পৰা এনে ঔষধ আঁতৰোৱা হয় আৰু ইয়াৰ বিক্ৰীত নিষেধাজ্ঞা আৰোপ কৰা হয়।

উৎসঃ দৈনিক জনমভূমি