ডিজিটেল ডেস্কঃ দুটা দশকৰ আগতে পুৰাতত্ত্ববিদসকলে মাটি খান্দি এটা বটল উদ্ধাৰ কৰিছিল। গৱেষণাৰ মতে বিশ্বৰ আটাইতকৈ পুৰণি লিপষ্টিক বটলটোৰ ভিতৰত আছে। বয়স ৩৭০০ বছৰ। ইৰাণৰ দক্ষিণৰ জিৰোফাত অঞ্চলত এই প্ৰসাধন সামগ্ৰী পোৱা গৈছিল।
২০০১ চনত পুৰাতত্ত্ববিদসকলে জিৰ’ফাট অঞ্চলৰ পৰা এটা বটলৰ ভিতৰত লিপষ্টিক উদ্ধাৰ কৰে। এটা উজ্জ্বল ৰঙা ৰঙৰ লিপষ্টিক। প্ৰসাধন সামগ্ৰীসমূহ পোৱা গ’লেও ইয়াৰ বয়সৰ বিষয়ে পুৰাতত্ত্ববিদসকলে নিশ্চিত হ’ব পৰা নাছিল। প্ৰায় দুটা দশকৰ গৱেষণাৰ অন্তত তেওঁলোকে এই প্ৰসাধন সামগ্ৰীৰ সঠিক বয়স নিৰ্ণয় কৰিলে।
ৰেডিঅ’কাৰ্বন ডেটিং ব্যৱহাৰ কৰি ইয়াৰ বয়স নিৰ্ণয় কৰি তেওঁলোকে গম পালে যে এইটোৱেই বিশ্বৰ আটাইতকৈ পুৰণি লিপষ্টিক। এই ৩৭০০ বছৰীয়া লিপষ্টিকটো খ্ৰীষ্টপূৰ্ব ১৬৮৭ চনত নিৰ্মাণ কৰা হৈছিল বুলি Scientific Reports নামৰ আলোচনীখনত প্ৰকাশিত এক প্ৰতিবেদনত প্ৰকাশ পাইছে।
পুৰাতত্ত্ববিদসকলৰ মতে এই লিপষ্টিক মূলতঃ হেমাটাইট নামৰ খনিজ পদাৰ্থৰে তৈয়াৰ কৰা হয়। লিপষ্টিক ৰঙা ৰঙৰ কাৰণ হ’ল হেমাটাইট নামৰ অক্সাইড খনিজ পদাৰ্থৰ উপস্থিতি। উজ্জ্বল ৰঙা ৰঙৰ উৎপত্তি এই খনিজ পদাৰ্থৰ পৰাই হয়। এই লিপষ্টিকটো এটা সুন্দৰকৈ খোদিত বটলত ৰখা হৈছে।
Continue Reading
