বিশ্ব কাপ চাবলৈ ৫০ কোটিৰ আৱেদন, ফিফাৰ সৰ্বশ্রেষ্ঠ প্রতিযোগিতাক লৈ ফুটবলপ্ৰেমীৰ অভূতপূর্ব উৎসাহ

ডিজিটেল ডেস্ক : ফিফা বিশ্ব কাপক লৈ এইবাৰ দৰ্শকৰ মাজত অভূতপূর্ব উৎসাহ দেখিবলৈ পোৱা গৈছে। এইবাৰৰ বিশ্ব কাপ ১২ জুনৰ পৰা আমেৰিকা, কানাডা আৰু মেক্সিকোত অনুষ্ঠিত হ'ব। 

'ৰেণ্ডম ছিলেকশ্যন ড্র' টিকট বিক্ৰীৰ বাবে যোৱা বছৰ ১১ ডিচেম্বৰৰ পৰা ১৩ জানুৱাৰীলৈ ফুটবলপ্ৰেমীৰ আৱেদন বিচৰা হৈছিল। বিশ্ব কাপৰ টিকট ক্ৰয়ৰ বাবে ফিফাৰ ২১১খন সদস্য/সদস্যা দেশৰ সকলোৰে পৰা ফুটবলপ্ৰেমীয়ে আৱেদন জনাইছে। সর্বাধিক সংখ্যক আৱেদন পোৱা গৈছে আয়োজক আমেৰিকা, মেক্সিকো আৰু কানাডাৰ পৰা। 

তদুপৰি, জার্মানি, ইংলেণ্ড, ব্রাজিল, স্পেইন, পর্তুগাল, আর্জেণ্টিনা আৰু কলম্বিয়াৰো সৰ্বাধিক সংখ্যক ফুটবলপ্রেমীয়ে বিশ্ব কাপৰ টিকট লাভৰ বাবে আৱেদন জনাইছে।

আৱেদনৰ উত্তৰসমূহ ৫ ফেব্ৰুৱাৰীৰ আগে আগে ই-মেইল যোগে জনোৱা হ'ব। উল্লেখযোগ্য যে আৱেদনৰ বাবে নির্ধাৰণ কৰা ৩৩দিনীয়া সময়সীমাৰ ভিতৰত প্ৰতিদিনে প্রায় ডেৰ কোটি লোকে টিকট ক্ৰয়ৰ বাবে আৱেদন জনাইছিল। বিশ্বৰ ক্ৰীড়াৰ ইতিহাসত ইমান বৃহৎসংখ্যক লোকে টিকট ক্ৰয়ৰ বাবে আৱেদন জনোৱাৰ নজিৰ ইয়াৰ আগতে নাছিল। 

এইবাৰৰ বিশ্ব কাপত প্ৰথমবাৰৰ বাবে ৪৮টা দলে খেলিব। টিকট বিচাৰি সৰ্বাধিক সংখ্যক ফুটবলপ্রেমীয়ে আৱেদন জনাইছে ২৭জুনত মিয়ামীত হ'বলগীয়া কলম্বিয়া আৰু পর্তুগালৰ মেচখনৰ বাবে। সর্বাধিক সংখ্যক টিকট বিচাৰি আৱেদন জনোৱা প্রথম পাঁচখন দেশৰ ভিতৰত ১৮ জুনত গোৱাডলহাৰাত মেক্সিকো আৰু দক্ষিণ কোৰিয়া, ১৯ জুলাইত নিউয়কৰ্কৰ নিউজাৰ্চিত হ'বলগীয়া ফাইনেলখন, ১১ জুনত মেক্সিকো চিটিত মেক্সিকো আৰু দক্ষিণ আফ্রিকাৰ মেচখনো আছে। ফিফাৰ সভাপতি জিয়ানো ইনফেণ্টিনোৱে কয়, 'মাত্র এমাহত টিকটৰ বাবে আধা কোটিতকৈ অধিক অনুৰোধ, চাহিদাতকৈ বহুত বেছি, ই এক বিশ্ব পৰ্যায়ৰ বিবৃতি।' 

বিশ্ব কাপৰ মেচ চোৱাৰ বাবে বিশ্বৰ ফুটবলপ্রেমীসকলে দেখুওৱা উৎসাহৰ বাবে তেওঁলোকৰ প্ৰতি কৃতজ্ঞতা প্রকাশ কৰিছে ইনফেণ্টিনোৱে । ফিফাই এতিয়া আৱেদনসমূহ পর্যালোচনা কৰি নিৰপেক্ষভাৱে টিকটৰ সম্পর্কত সিদ্ধান্ত ল'ব।

উৎসঃ দৈনিক জনমভূমি