১৪ ফেব্ৰুৱাৰীৰ পৰা আই এছ এল

ডিজিটেল ডেস্ক : অৱশেষত জল্পনা-কল্পনা আৰু সংশয়ৰ অৱসান ঘটিল। ১৪টা ক্লাবৰ অংশগ্রহণেৰে অহা ১৪ ফেব্রুৱাৰীৰ পৰা আৰম্ভ হ'ব ইণ্ডিয়ান ছুপাৰ লীগ (আই এছ এল)। প্রতিযোগিতাখন হোম-এৱে ফর্মেটত অনুষ্ঠিত হ'ব।

মঙলবাৰে ক্লাবৰ মিত্রজোঁট, সর্বভাৰতীয় ফুটবল ফেডাৰেশ্যন আৰু চৰকাৰৰ সৈতে হোৱা বৈঠকৰ অন্তত কেন্দ্রীয় ক্রীড়ামন্ত্রী মনসুখ মন্দাভিয়াই প্রতিযোগিতা আৰম্ভ হোৱাৰ দিন ঘোষণা কৰে। পৃষ্ঠপোষকতাকে ধৰি একাধিক জটিলতাৰ বাবে আই এছ এল অনিশ্চিত হৈ আছিল। ইয়াৰ সমাধান উলিওৱাত ব্যর্থ হয় সর্বভাৰতীয় ফুটবল ফেডাৰেশ্যনো। 

আই এছ এলব ক্লাবসমূহৰ মিত্রজোঁট আৰু মন্ত্ৰ্যালয়ৰ সৈতে একাধিক আলোচনা কৰিও সমস্যাৰ সমাধান কৰিব পৰা নাছিল। আই এছ এলব ক্লাবসমূহৰ মিত্রজোঁটেও লীগ আয়োজনৰ প্রস্তাৱ দিছিল। আয়-ব্যয়ৰ সন্দর্ভতো কেইবাটাও চর্ত দিছিল। অৱশেষত ক্রীড়া মন্ত্র্যালয়ৰ হস্তক্ষেপত সর্বভাৰতীয় ফুটবল ফেডাৰেশ্যনে (এ আই এফ এফ) আই এছ এল আয়োজন কৰিবলৈ ওলাইছে। কেন্দ্রীয় ক্রীড়া মন্ত্রী মন্দাভিয়াই কয়, 'আই এছ এলক লৈ বহু জল্পনা-কল্পনা চলিছিল। পিছে আজি চৰকাৰ, ফুটবল ফেডাৰেশ্যন আৰু মোহনবাগান আৰু ইষ্ট বেংগলসহ মুঠ ১৪টা ক্লাবৰ মাজত এখন বৈঠক অনুষ্ঠিত হয়। আমি সিদ্ধান্ত লৈছোঁ যে ১৪ ফেব্রুৱাৰীৰ পৰা আই এছ এল আৰম্ভ হ'ব। সকলো ক্লাবে অংশগ্রহণ কৰিব।' প্রতিযোগিতাখন পূৰ্বৰ দৰেই হোম-এৱে ফর্মেটতে হ'ব। মুঠ ৯১খন খেল অনুষ্ঠিত হ'ব। কিন্তু দলসমূহৰ ভ্রমণ আৰু থকাৰ ব্যৱস্থাকে ধৰি প্রতিযোগিতাৰ সময়সূচী আৰু স্থানক লৈ বিবেচনা কৰি থকা হৈছে। 

কেন্দ্রীয় ক্রীড়া মন্ত্রীগৰাকীয়ে কয় যে সেইবোৰ সমস্যা সমাধানৰ বাবে প্রচেষ্টা চলোৱা হৈছে। ক্লাবসমূহে কিমান মেচ খেলিব লাগিব অথবা প্রতিযোগিতাৰ আন্তঃগাঁথনিৰ বিষয়ে অৱগত কৰা হোৱা নাই। ইফালে প্রতিযোগিতা আয়োজনৰ বাবে মুঠ খৰচৰ পৰিমাণ নির্ধাৰণ কৰা হৈছে ২৪ কোটি ২৬ লাখ টকা। ইয়াৰ এ আই এফ এফে ১.৭৭ কোটি টকা দিব। বাকী ধন দিব ক্লাবসমূহে। লীগৰ স্বার্থত প্রতিটো ক্লাবে ফ্রেন্সাইজী মাচুল হিচাপে ১ কোটি টকাৰ অলপ বেছি দিবলৈ সন্মত হৈছে। ইয়াৰ লগতে ঘৰুৱা খেলৰ খৰচো তেওঁলোকে বহন কৰিব।

উৎসঃ দৈনিক জনমভূমি