এজন খেতিয়কৰ পুত্ৰৰ চমক: পঢ়া শেষ নৌহওঁতেই ৪০ হাজাৰৰ AI ষ্টাৰ্টআপৰ পৰা ৪০ কোটিৰ উপাৰ্জন

ডিজিটেল ডেস্কঃ প্ৰতিভা আৰু কঠিন পৰিশ্ৰম থাকিলে যে যিকোনো বাধাই হাৰ মানিবলৈ বাধ্য, সেয়া পুনৰবাৰ প্ৰমাণ কৰিলে এজন কৃষিজীৱী পৰিয়ালৰ সন্তানে। 

উত্তৰ প্ৰদেশৰ আলিগড়ৰ এজন যুৱকে মাত্ৰ ৪০ হাজাৰ টকাৰ সামান্য মূলধনেৰে আৰম্ভ কৰা এটা কৃত্ৰিম বুদ্ধিমত্তা (AI) ভিত্তিক ষ্টাৰ্টআপৰ জৰিয়তে বৰ্তমান ৪০ কোটি টকাৰ ব্যৱসায়িক সাম্ৰাজ্য গঢ়ি তুলি দেশজুৰি চৰ্চিত হৈছে।

যুৱকজনৰ পিতৃ এজন সাধাৰণ কৃষক যদিও পুত্ৰৰ উচ্চাকাংক্ষাত তেওঁ কেতিয়াও বাধা দিয়া নাছিল। অভিযান্ত্ৰিক শিক্ষা গ্ৰহণ কৰি থকা অৱস্থাতে যুৱকজনে অনুভৱ কৰিছিল যে ভৱিষ্যতৰ পৃথিৱী কৃত্ৰিম বুদ্ধিমত্তাৰ ওপৰত নিৰ্ভৰশীল হ’ব। সেই উদ্দেশ্যে পঢ়া-শুনা কৰি থকাৰ মাজতেই তেওঁ নিজৰ এটা সৰু ষ্টাৰ্টআপ আৰম্ভ কৰাৰ সিদ্ধান্ত লয়।

আৰম্ভণিতে তেওঁৰ হাতত আছিল মাত্ৰ ৪০,০০০ টকা। কিন্তু তেওঁৰ ধাৰণা আছিল আধুনিক আৰু বাস্তৱসন্মত। তেওঁৰ এই AI ষ্টাৰ্টআপটোৱে মূলত: বিভিন্ন উদ্যোগৰ বাবে স্বয়ংক্ৰিয় কাৰিকৰী সমাধান প্ৰদান কৰে। জটিল ডাটা বিশ্লেষনৰ জৰিয়তে ব্যৱসায়িক লাভ বৃদ্ধিৰ পৰামৰ্শ দিয়ে। বৰ্তমান দেশ-বিদেশৰ বহু আগশাৰীৰ প্ৰতিষ্ঠানে তেওঁৰ এই সেৱা গ্ৰহণ কৰিছে।

এক নতুন অনুপ্ৰেৰণা

ডিগ্ৰী লাভ কৰাৰ পূৰ্বেই তেওঁ এগৰাকী সফল উদ্যমী হিচাপে নিজকে প্ৰতিষ্ঠা কৰিছে। বৰ্তমান তেওঁৰ কোম্পানীৰ বাৰ্ষিক লেনদেন আৰু মূল্য ৪০ কোটি টকা স্পৰ্শ কৰিছে। সংবাদ মাধ্যমৰ সৈতে হোৱা বাৰ্তালাপত যুৱকজনে কয় যে:

"কেৱল চাকৰিৰ পাছত দৌৰাতকৈ নতুন কিবা এটা সৃষ্টি কৰাৰ হাবিয়াস আছিল। আৰ্থিক নাটনি আছিল যদিও সাহস আৰু কৌশলৰ বলত আজি মই এই স্থান পাইছোঁ।"

ভাৰতৰ দৰে এখন কৃষি প্ৰধান দেশত এজন কৃষকৰ সন্তানে প্ৰযুক্তিৰ জৰিয়তে বিশ্বক জয় কৰা এই কাহিনীয়ে দেশৰ লাখ লাখ শিক্ষিত নিবনুৱা যুৱক-যুৱতীৰ বাবে আশাৰ পোহৰ কঢ়িয়াই আনিছে। য’ত সুযোগ সীমিত, তাতেই উদ্ভাৱনী চিন্তাৰ প্ৰয়োগ কৰি কেনেকৈ সফল হ’ব পাৰি, এই যুৱকজনে তাৰেই এক উৎকৃষ্ট উদাহৰণ দাঙি ধৰিছে।