"মই জীয়াই আছোঁ আৰু সুস্থ আছোঁ" - উৰাবাতৰি বিয়পোৱা লোকক সকীয়নী অভিনেতা শক্তি কাপুৰৰ

ডিজিটেল ডেস্কঃ বলীউডৰ জ্যেষ্ঠ অভিনেতা শক্তি কাপুৰৰ মৃত্যু হোৱা বুলি ছ’চিয়েল মিডিয়াত বিয়পি পৰা এক ভুৱা বাতৰিয়ে সমগ্ৰ দেশতে তীব্ৰ চাঞ্চল্যৰ সৃষ্টি কৰিছে। 

এই বিৰূপ পৰিস্থিতিৰ পাছতেই অভিনেতাগৰাকীয়ে সংবাদ মাধ্যমৰ আগত মুখ খুলি নিজৰ কুশল সংবাদ দিয়াৰ লগতে উৰাবাতৰি বিয়পোৱা লোকৰ বিৰুদ্ধে কঠোৰ আইনী ব্যৱস্থা গ্ৰহণৰ হুংকাৰ দিছে।

যোৱা কিছু সময় ধৰি বিভিন্ন ছ’চিয়েল মিডিয়া প্লেটফৰ্মত এটা খবৰ বনজুইৰ দৰে বিয়পি পৰিছিল যে শক্তি কাপুৰৰ মৃত্যু ঘটিছে। এই বাতৰিটো ভাইৰেল হোৱাৰ লগে লগে অভিনেতাগৰাকীৰ অনুৰাগী আৰু আত্মীয়সকলৰ মাজত হুৱাদুৱা লাগে। বহুতে ছ’চিয়েল মিডিয়াত শোক প্ৰকাশ কৰিবলৈও আৰম্ভ কৰিছিল।

এই সমগ্ৰ ঘটনাক লৈ অত্যন্ত ক্ষোভ প্ৰকাশ কৰি শক্তি কাপুৰে জানিবলৈ দিয়ে যে তেওঁ সম্পূৰ্ণৰূপে সুস্থ আছে। অভিনেতাগৰাকীয়ে কয়: "মই জীয়াই আছোঁ আৰু বহুত ভালদৰে আছোঁ। এনেধৰণৰ খবৰে মোৰ পৰিয়াল আৰু শুভাকাংক্ষীসকলক বিচলিত কৰি তুলিছে। যিসকলে এনে নিম্ন মানসিকতাৰ কাম কৰিছে, তেওঁলোকক মই এৰি নিদিওঁ।"

কেৱল মৌখিক স্পষ্টীকৰণতে ক্ষান্ত নাথাকি শক্তি কাপুৰে এতিয়া আইনী পথ গ্ৰহণ কৰাৰ কথা ঘোষণা কৰিছে। তেওঁ জানিবলৈ দিয়ে যে এনে ভুৱা বাতৰি প্ৰচাৰ কৰা উৎসসমূহ চিনাক্ত কৰিবলৈ তেওঁ চাইবাৰ আৰক্ষীৰ সহায় ল’ব। যিসকলে এনে বিভ্ৰান্তিকৰ তথ্য বিয়পাইছে, তেওঁলোকৰ বিৰুদ্ধে মানহানিৰ গোচৰ তৰা হ’ব বুলিও তেওঁ হুংকাৰ দিয়ে।

প্ৰায় ৭০০তকৈও অধিক ছবিত অভিনয় কৰা অভিনেতাগৰাকীয়ে তেওঁৰ অনুৰাগীসকলক যিকোনো খবৰ শ্বেয়াৰ কৰাৰ আগতে তাৰ সত্যতা পৰীক্ষা কৰিবলৈ অনুৰোধ জনাইছে। বৰ্তমান তেওঁ তেওঁৰ আগন্তুক চিনেমাৰ কামত ব্যস্ত আছে বুলিও প্ৰতিবেদনত উল্লেখ কৰা হৈছে।