ডিজিটেল ডেস্কঃ মণিপুৰৰ অস্থিৰ পৰিস্থিতিৰ মাজতে ইম্ফলত এক উত্তেজনাপূৰ্ণ ঘটনা সংঘটিত হৈছে। কৰ্তব্যৰত আৰক্ষী জোৱানৰ পৰা অস্ত্ৰ কাঢ়ি নিবলৈ চেষ্টা কৰা আৰু চৰকাৰী সান্ধ্য আইন উলংঘা কৰাৰ অভিযোগত মণিপুৰ আৰক্ষীয়ে ৬ জন যুৱকক গ্ৰেপ্তাৰ কৰিছে।
বিষ্ণুপুৰ জিলাত শেহতীয়াকৈ সংঘটিত বোমা বিস্ফোৰণৰ পৰিপ্ৰেক্ষিতত সমগ্ৰ অঞ্চলটোত কঠোৰ নিৰাপত্তা ব্যৱস্থা আৰু সান্ধ্য আইন জাৰি কৰা হৈছিল। এই সান্ধ্য আইন অমান্য কৰি একাংশ লোকে বিশৃংখল পৰিৱেশ সৃষ্টি কৰিবলৈ চেষ্টা কৰাৰ সময়তে এই গ্ৰেপ্তাৰৰ ঘটনাটো ঘটে।
আৰক্ষীৰ সূত্ৰই জনোৱা মতে, ধৃত যুৱককেইজনে হেইগাং থানা এলেকাৰ অন্তৰ্গত আ হাল্লুপ মাখা লেইকাই নামৰ ঠাইত সান্ধ্য আইন ভংগ কৰি সমবেত হৈছিল। নিৰাপত্তাৰক্ষীয়ে তেওঁলোকক বাধা দিবলৈ চেষ্টা কৰোঁতে তেওঁলোকে ওলোটাই আৰক্ষীৰ ওপৰত আক্ৰমণ চলাইছিল আৰু জোৱানসকলৰ হাতৰ পৰা অস্ত্ৰ কাঢ়ি ল’বলৈ প্ৰচেষ্টা চলাইছিল।
মণিপুৰ আৰক্ষীয়ে এক বিবৃতিযোগে জনাইছে যে ৰাজ্যখনত আইন-শৃংখলা অটুট ৰাখিবলৈ প্ৰশাসন সংকল্পবদ্ধ। সান্ধ্য আইন উলংঘা কৰা বা নিৰাপত্তাৰক্ষীৰ কামত বাধা প্ৰদান কৰা যিকোনো লোকৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।
বৰ্তমান সমগ্ৰ ইম্ফলত নিৰাপত্তা ব্যৱস্থা অধিক কটকটীয়া কৰি তোলা হৈছে আৰু সন্দেহজনক গতিবিধিৰ ওপৰত তীব্ৰ নজৰ ৰখা হৈছে।
Continue Reading
