ইউনুছৰ আমোলৰ সিদ্ধান্ত সলনি কৰিলে নতুন চৰকাৰে, আই পি এলৰ সম্প্ৰচাৰত নিষেধাজ্ঞা প্রত্যাহাৰ বাংলাদেশৰ

ডিজিটেল ডেস্ক: বাংলাদেশত আই পি এলৰ সম্প্ৰচাৰৰ পথ মুকলি কৰিলে দেশখনৰ চৰকাৰে। মহম্মদ ইউনুছৰ নেতৃত্বাধীন পূৰ্বৰ অন্তৰ্ৱতী চৰকাৰে আই পি এলৰ মেচৰ সম্প্ৰচাৰত আৰোপ কৰা নিষেধাজ্ঞা নতুন চৰকাৰে প্ৰত্যাহাৰ কৰে। 

দেশখনৰ নতুন তথ্য আৰু সম্প্ৰচাৰ মন্ত্ৰী জাহিৰ উদ্দিন স্বপনে স্পষ্ট কৰি দিয়ে যে বাংলাদেশত আই পি এৰ সম্প্ৰচাৰত কোনো ধৰণৰ বাধা নাই। তেওঁ কয় যে চৰকাৰে ক্ৰীড়া আৰু ৰাজনীতিক সানমিহলি কৰিবলৈ নিবিছাৰে। এতিয়া আই পি এলৰ সম্প্ৰচাৰক বাণিজ্যিক দিশেৰেহে চোৱা হ'ব। যিবিলাক চেনেলে আই পি এলৰ খেল সম্প্ৰচাৰ কৰিবলৈ বিচাৰে তেওঁলোকে আবেদন জনাব পাৰে আৰু তেওঁলোকৰ আৱেদনক ইতিবাচক দৃষ্টিভংগীৰে চোৱা হ'ব বুলি মন্ত্ৰীজনে স্পষ্ট কৰি দিয়ে। তেওঁ লগতে কয় যে এতিয়ালৈকে কোনো চেনেলে আই পি এৰ মেচৰ সম্প্ৰচাৰৰ অনুমতি বিচাৰি আৱেদন জনোৱা নাই। আনহাতে যদিহে ষ্টাৰ স্পৰ্টছৰ দৰে আন্তঃৰাষ্ট্ৰীয় স্পর্টছ নেটৱর্কে আই পি এলৰ মেচ বাংলাদেশত দেখুৱাবলৈ বিচাৰে তেতিয়া ইয়াত কোনো ধৰণৰ বাধা নাই। মন্ত্রীজনে কয়, 'চৰকাৰে কাকো বাধ্য নকৰে বা কোনো ধৰণৰ বাধা আৰোপ নকৰে।' 

উল্লেখযোগ্য যে বাংলাদেশৰ বেগী বলাৰ মুস্তাফিজুৰ ৰহমানক আই পি এলৰ পৰা বাহিৰ কৰাৰ পাছত দুয়োখন দেশৰ ক্রিকেট সম্পৰ্কত বিতৰ্কৰ সূত্রপাত হয় আৰু বাংলাদেশ ক্রিকেট ব'ৰ্ডৰ ভাৰতীয় ক্রিকেট নিয়ন্ত্রণ ব'ৰ্ডৰ সৈতে সম্পৰ্কৰ অৱনতি ঘটে। বাংলাদেশৰ সেই সময়ৰ মহম্মদ ইউনুছৰ নেতৃত্বাধীন অন্তৰ্ৱর্তী চৰকাৰে ভাৰতত অনুষ্ঠিত টি-২০ বিশ্ব কাপলৈ বাংলাদেশৰ দল প্ৰেৰণ কৰিবলৈ অস্বীকাৰ কৰে। ইয়াৰ পাছত বিশ্ব কাপত আন্তঃৰাষ্ট্ৰীয় ক্রিকেট পৰিষদে (আই চি চি) বাংলাদেশৰ স্থানত স্কটলেণ্ডক খেলাৰ সুযোগ দিয়ে। একে সময়তে ইউনুছৰ চৰকাৰে আই পি এলৰ সম্প্ৰচাৰতো নিষেধাজ্ঞা আৰোপ কৰিছিল।

উৎসঃ দৈনিক জনমভূমি