চীনৰ পাৰমাণৱিক মিছাইলত তেলৰ সলনি ওলাল পানী , ক্ষুব্ধ জিনপিঙে বহিষ্কাৰ কৰিলে কেইবাজনো শীর্ষ সেনা বিষয়াক

ডিজিটেল ডেস্ক : বিশ্বৰ অন্যতম শক্তিধৰ ৰাষ্ট্ৰ চীনৰ পাৰমাণৱিক মিছাইলত তেলৰ সলনি ওলাইছে পানী। মার্কিন চোৰাংচোৱাৰ প্রতিবেদনত এই বিস্ফোৰক তথ্য প্রকাশ পাইছে।

যোৱা কিছুদিন ধৰি চীনৰ সামৰিক বাহিনী আৰু দেশখনৰ ৰাষ্ট্ৰপতি ঝি জিনপিঙৰ মাজত সংঘাত সৃষ্টি হোৱাৰ খবৰ ওলাই আহিছে। তাৰ মাজতে যোৱা ১৯ জানুৱাৰীত দেশখনৰ পাৰমাণৱিক অস্ত্ৰৰ গোপন তথ্য আমেৰিকাক যোগান ধৰাৰ অভিযোগত সেনাৰ শীৰ্ষ বিষয়া ঝাং ইউজিয়াক বহিষ্কাৰ কৰা হৈছিল। 

এনে এক সময়তে দেশখনৰ পাৰমাণৱিক মিছাইলত তেলৰ সলনি পানী ওলোৱাৰ খবৰে বিশ্বজুৰি বিশেষ চর্চা লাভ কৰিছে। দিনচেৰেক পূৰ্বে আমেৰিকাৰ গুপ্তচৰ সংস্থা চি আই এৰ সহযোগত চীনৰ সেনাই দেশখনৰ ৰাষ্ট্ৰপতি জিনপিঙক গাদীচ্যুত কৰিবলৈ বিচৰা বুলিও প্রকাশ পাইছিল। এনে সময়তে মিছাইলত পানী ওলোৱাৰ এই ঘটনাত ক্ষুব্ধ হৈ পৰিছে জিনপিং। 

তেওঁ ইতিমধ্যে সামৰিক বাহিনীৰ কেইবাজনো বিষয়াক পদৰ পৰা নিলম্বিত কৰাৰ তথ্য প্ৰকাশ পাইছে। তদুপৰি, সমগ্ৰ ঘটনাৰ তদন্তৰ বাবে এখন উচ্চ পৰ্যায়ৰ তদন্ত সমিতি গঠন কৰা বুলিও প্রকাশ পাইছে। ইফালে, চীনৰ সেনা বাহিনী পি এল এত দীর্ঘদিন ধৰি বৃহৎ দুর্নীতি সংঘটিত হৈ থকা বুলিও চোৰাংচোৱা সূত্ৰত প্রকাশ।

উৎসঃ দৈনিক জনমভূমি