ডিজিটেল ডেস্কঃ ভাৰতীয় অৰ্থনীতিত এতিয়া ডিজিটেল বিপ্লৱৰ জোৱাৰ উঠিছে। শেহতীয়া চৰকাৰী পৰিসংখ্যা অনুসৰি, যোৱা কেইবছৰমানত দেশত ডিজিটেল লেনদেনৰ পৰিমাণ আশাব্যঞ্জকভাৱে বৃদ্ধি পাইছে।
বিশেষকৈ UPI-এ সাধাৰণ জনতাৰ ধন লেনদেনৰ ধৰণ সম্পূৰ্ণৰূপে সলনি কৰি দিছে। বিত্ত মন্ত্ৰালয়ৰ তথ্য অনুসৰি, দেশত ডিজিটেল লেনদেনৰ হাৰ প্ৰায় ১১ গুণ বৃদ্ধি পাইছে।
বৰ্তমান ভাৰতত হোৱা মুঠ ডিজিটেল লেনদেনৰ অধিকাংশই (প্ৰায় ৮০ শতাংশ) UPI-ৰ জৰিয়তে সম্পন্ন হয়। চাহৰ দোকানৰ পৰা আৰম্ভ কৰি ডাঙৰ শ্বপিং মললৈকে, সকলোতে এতিয়া UPI QR ক’ডৰ আধিপত্য। তথ্য অনুসৰি, দেশত UPI ব্যৱহাৰকাৰী বেংকৰ সংখ্যা ২১৬ খনৰ পৰা বৃদ্ধি পাই এতিয়া ৬৬১ খন হৈছে।
উল্লেখ্য যে , গ্ৰাহকসকলে নগদ ধনতকৈ ডিজিটেল মাধ্যমক অধিক নিৰাপদ আৰু সহজ বুলি গণ্য কৰিবলৈ লৈছে। ইয়াৰ মূল কাৰণসমূহ হ’ল:
ব্যৱহাৰৰ সহজলভ্যতা: মোবাইলৰ জৰিয়তে যিকোনো সময়তে তৎক্ষণাত ধন প্ৰেৰণ কৰিব পাৰি।
নগদ ধনৰ প্ৰয়োজন হ্ৰাস: বৰ্তমান ৩৮ শতাংশ গ্ৰাহকেহে নগদ ধন ব্যৱহাৰ কৰে, আনহাতে ৫৭ শতাংশই UPI-ক অগ্ৰাধিকাৰ দিয়ে।
ক্ষুদ্ৰ ব্যৱসায়ীৰ সঁহাৰি: প্ৰায় ৯৪ শতাংশ ক্ষুদ্ৰ ব্যৱসায়ীয়ে এতিয়া ডিজিটেল পেমেণ্ট গ্ৰহণ কৰে।
কেন্দ্ৰীয় চৰকাৰে ডিজিটেল লেনদেনক উদগনি দিবলৈ ৰূপায়ণ কৰা আঁচনিসমূহৰ ফলত এই সফলতা সম্ভৱ হৈছে। চৰকাৰে RuPay ডেবিট কাৰ্ড আৰু BHIM-UPI লেনদেনৰ বাবে প্ৰায় ৮,২৭৬ কোটি টকাৰ বিশেষ উদগনিমূলক পেকেজ ঘোষণা কৰিছিল। ইয়াৰ ফলত দেশৰ চুকে-কোণে ডিজিটেল আন্তঃগাঁথনি শক্তিশালী হৈ উঠিছে। বৰ্তমান দেশত প্ৰায় ৬৫.৮ কোটি UPI QR ক’ড কাৰ্যক্ষম হৈ আছে।
এই ডিজিটেল বিপ্লৱৰ নেতৃত্ব দিছে দেশৰ যুৱ প্ৰজন্মই। ১৮ৰ পৰা ২৫ বছৰ বয়সৰ ভিতৰত থকা যুৱক-যুৱতীসকলৰ ভিতৰত প্ৰায় ৬৬ শতাংশই নগদ বিহীন লেনদেনৰ ওপৰত নিৰ্ভৰশীল।
ডিজিটেল লেনদেনৰ এই অভূতপূৰ্ব বৃদ্ধিয়ে ভাৰতক বিশ্বৰ ভিতৰতে এক আগশাৰীৰ 'ফাইনেন্সিয়েল টেকন’লজি' কেন্দ্ৰ হিচাপে গঢ়ি তুলিছে। ইয়াৰ ফলত অৰ্থনীতি অধিক স্বচ্ছ হোৱাৰ লগতে সাধাৰণ জনতাৰ বেংকিং সেৱাৰ অভিজ্ঞতা অধিক সুলভ হৈ পৰিছে।
Continue Reading
