ৰাষ্ট্ৰীয় ৰেংকিং টেনিছৰ ছুপাৰ ছিৰিজ খিতাপ জয় অসম কন্যা ফাগুন জ্যোতিৰ

ডিজিটেল ডেস্কঃ অসমৰ প্ৰতিভাবান টেনিছ খেলুৱৈ ফাগুন জ্যোতিয়ে ৰাষ্ট্ৰীয় ৰেংকিং ছুপাৰ ছিৰিজ টেনিছ প্ৰতিযোগিতাৰ খিতাপ জয় কৰিবলৈ সক্ষম হৈছে৷ 

ৰাজস্থানৰ ৰাজধানী জয়পুৰত অনুষ্ঠিত আইটাৰ সৰ্বভাৰতীয় প্ৰতিযোগিতাখনত আজি অসম কন্যাই অনবদ্য প্ৰদৰ্শন কৰি ১২ অনূধ্বৰ্ ছোৱালীৰ একক শাখাৰ খিতাপ অৰ্জন কৰে৷ জয়পুৰ ড্ৰিম হাউছ ৰিছ’ৰ্টত আজি সামৰণি পৰা ৰাষ্ট্ৰীয় ৰেংকিং ছুপাৰ ছিৰিজ প্ৰতিযোগিতাখনত ফাগুনে ফাইনেলত ৬-৪, ৬-২ ৰ পোনপটিয়া ছেটত পৰাস্ত কৰে উত্তৰ প্ৰদেশৰ শুভি ৰঞ্জনক৷ 

উল্লেখ্য যে চমকপ্ৰদ প্ৰদৰ্শনৰে ধাৰাবাহিক সফলতা অৰ্জন কৰি অহা ফাগুনৰ আজি ছুপাৰ ছিৰিজ খিতাপ জয়ে ৰাষ্ট্ৰীয় স্তৰত অসমৰ টেনিছ খেলুৱৈৰ গৌৰৱময় অনিৰুদ্ধ যাত্ৰাক অধিক শক্তিশালী কৰাৰ লগতে ৰাজ্যৰ নৱাগত খেলুৱৈসকলৰ সুদৃঢ় স্থিতিক নতুনকৈ উজ্বলাই তুলিব৷ গুৱাহাটীৰ চচলস্থিত অসম টেনিছ সন্থাৰ প্ৰশিক্ষণ কেন্দ্ৰৰ প্ৰশিক্ষাৰ্থী ফাগুন মহানগৰীৰ হোলী চাইল্ড স্কুলৰ ছাত্ৰী৷ ফাগুণৰ এই সফলতাৰ বাবে অসম টেনিছ সন্থাই খেলুৱৈগৰাকীক অভিনন্দন জনাইছে৷