বিহাৰত বিষাক্ত সুৰাই মাতিলে বিপদ: ৪ জনৰ কৰুণ মৃত্যু, দৃষ্টিশক্তি হেৰুৱালে কেইবাজনেও

ডিজিটেল ডেস্কঃ বিহাৰৰ পূব চম্পাৰণ জিলাত পুনৰ সংঘটিত হৈছে এক শোকাৱহ বিষাক্ত সুৰা ট্ৰেজেডী। জিলাখনৰ বালগংগা গাঁৱত বিষাক্ত সুৰাপান কৰি অতি কমেও চাৰিজন লোকৰ মৃত্যু হোৱাৰ বিপৰীতে কেইবাজনো লোক বৰ্তমান গুৰুতৰভাৱে অসুস্থ হৈ চিকিৎসাধীন হৈ আছে। এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।

খবৰ অনুসৰি, বুধবাৰে সন্ধিয়া গাঁওখনৰ কেইবাজনো লোকে স্থানীয়ভাৱে তৈয়াৰী সন্দেহজনক সুৰা সেৱন কৰিছিল। সুৰা সেৱনৰ কিছু সময় পিছৰে পৰা তেওঁলোকৰ শৰীৰত তীব্ৰ বিষ, মূৰ ঘূৰোৱা আৰু বমিৰ দৰে লক্ষণ দেখা দিয়ে। মৃত লোকসকলক ক্ৰমে প্ৰমোদ যাদৱ, চান্দু কুমাৰ, পৰিশান মাঝি বুলি চিনাক্ত কৰা হৈছে। আন এজন মৃত ব্যক্তিৰ পৰিচয় এতিয়াও জানিব পৰা হোৱা নাই।

এই বিষাক্ত সুৰাৰ প্ৰভাৱ ইমানেই ভয়াবহ আছিল যে কেইবাজনো লোকে নিজৰ দৃষ্টিশক্তি হেৰুৱাই পেলাইছে। লোহে ঠাকুৰ নামৰ এজন ভুক্তভোগীয়ে সংবাদ মাধ্যমৰ আগত কয়,"আমি ইয়াক সাধাৰণ সুৰা বুলিয়েই ভাবিছিলোঁ, কিন্তু ইয়াত স্পিৰিট মিহলি আছিল। মোৰ এজন বন্ধুৱে এতিয়া চকুৰে একো নেদেখা হৈছে আৰু মই নিজেও ভীষণ অসুস্থ অনুভৱ কৰিছোঁ।"

ঘটনা সংক্ৰান্তত আৰক্ষীয়ে ক্ষিপ্ৰ ব্যৱস্থা গ্ৰহণ কৰি নাগা ৰায় নামৰ এজন অভিযুক্তক জিম্মাত লৈছে। তেওঁৰ বিৰুদ্ধে হত্যাৰ গোচৰ ৰুজু কৰা হৈছে। অভিযোগ অনুসৰি, নগা ৰায়েই গাঁওবাসীক এই বিষাক্ত সুৰা যোগান ধৰিছিল। আৰক্ষীৰ ভয়ত বহু লোকে এতিয়াও চৰকাৰী চিকিৎসালয়লৈ নোযোৱাকৈ ঘৰতে গোপনে চিকিৎসা লৈ থকা বুলি জানিব পৰা গৈছে।

বিহাৰত সুৰা নিষিদ্ধ থকাৰ স্বত্বেও এনেদৰে বিষাক্ত সুৰাৰ ফলত মৃত্যু হোৱা ঘটনাই নীতিশ কুমাৰ চৰকাৰৰ সুৰা বিৰোধী আইনৰ সফলতাক লৈ পুনৰ প্ৰশ্ন উত্থাপন কৰিছে। উল্লেখ্য যে, দুই বছৰ পূৰ্বে মোতিহাৰীত সংঘটিত অনুৰূপ এক ঘটনাত ৪২ জন লোকৰ মৃত্যু হৈছিল।

চিকিৎসকৰ মতে, এই সুৰাত মিথানল বা ঔদ্যোগিক স্পিৰিট ব্যৱহাৰ কৰাৰ ফলতেই মানুহৰ মৃত্যু আৰু অন্ধতাৰ দৰে ঘটনা সংঘটিত হৈছে।