গোসাইগাঁৱত শিল-বালিৰ অবৈধ খনন অব্যাহত, চৰকাৰে হেৰুৱাইছে লাখ লাখ টকাৰ ৰাজহ

ডিজিটেল ডেস্ক : বি টি চিৰ কোকৰাঝাৰ জিলাৰ গোসাঁইগাঁও মহকুমাৰ অন্তৰ্গত বিভিন্ন অঞ্চলত শিল-বালিৰ অবৈধ খনন অব্যাহত থকাৰ অভিযোগ উত্থাপিত হৈছে। কচুগাঁও বন সংমণ্ডলৰ অধীনস্থ একাধিক এলেকাত ভূ-মাফিয়াই জে চি বি আদিৰে দিন-দুপৰতে অবৈধভাৱে খনন চলাই থকাৰ অভিযোগ উত্থাপন কৰিছে স্থানীয় ৰাইজে। 

অভিযোগ অনুসৰি, অসম-বংগ সীমান্তৱৰ্তী সংকোষ নদীৰ লগতে কাশিয়াবাৰী, পকিহাগা আদি ঠাইত অবৈধ খনন অব্যাহত আছে। খনন কৰা শিল-বালি চুবুৰীয়া ৰাষ্ট্ৰ বাংলাদেশলৈ সৰবৰাহ কৰা হয় বুলি স্থানীয় সচেতন অভিযোগ কৰিছে। 

বি টি চি চৰকাৰৰ মুখ্য কাৰ্যবাহী সদস্য হাগ্রামা মহিলাৰী শাসনভাৰ লাভ কৰাৰ পাছত এই অবৈধ খনন প্রক্রিয়া চলি আছে বুলি অভিযোগ উঠিছে। ফলত বন বিভাগে লাখ লাখ টকাৰ ৰাজহ হেৰুৱাবলগীয়া হৈছে। অভিযোগ অনুসৰি, অবৈধ খনন কাৰ্যৰ সৈতে জনৈক 'মুছাহাৰী' উপাধিৰ এজন ব্যক্তিৰ নাম সাঙোৰ খাইছে। আনহাতে, কচুগাঁও বন সংমণ্ডলৰ দায়িত্বত থকা বিষয়া ডিৰেন বছমুতাৰী আৰু বি টি চিৰ ই এম পানিৰাম ব্ৰহ্মৰ ভূমিকাক লৈও প্রশ্ন উত্থাপিত হৈছে।

উৎসঃ দৈনিক জনমভূমি