আমেৰিকাত সোণ জিনিলে জামুগুৰিহাটৰ কন্দৰ্প বৰাই

ডিজিটেল ডেস্ক : শোণিতপুৰ জিলাৰ জামুগুৰিহাটৰ ধলাইবিল নিৱাসী কন্দৰ্প বৰা (কাকু)ই আমেৰিকাৰ বার্মিংহামত হৈ থকা ৱৰ্ল্ড পুলিচ এণ্ড ফায়াৰ গেমছ পাঞ্জাত ৭০ কিল'গ্রাম শাখাত স্বর্ণপদক জয় কৰিবলৈ সক্ষম হৈছে। যি খবৰে অঞ্চলটোৰ লগতে জিলাখনলৈ গৌৰৱ কঢ়িয়াই আনিছে।

উল্লেখযোগ্য যে আমেৰিকাৰ বার্মিংহামত অনুষ্ঠিত এই গেমছত ভাৰতৰ হৈ অংশগ্ৰহণ কৰিছিল অসম আৰক্ষীৰ চাৰিগৰাকী জোৱানে। এই চাৰিগৰাকী আৰক্ষী জোৱানেই পদক কঢ়িয়াই উজলালে অসমৰ লগতে দেশৰ নাম। ভাৰতৰ হৈ অসমৰ আন তিনিগৰাকীৰ ভিতৰত জামুগুৰিহাটৰ ধলাইবিলৰ কন্দৰ্প বৰাই সোঁ-শাখাত সোণৰ পদক আৰু বাওঁ-হাত শাখাতো সোণৰ পদক অর্জন কৰে।

প্ৰতিভাবান খেলুৱৈগৰাকী ধলাইবিলৰ ১নং বৰপথাৰ গাঁও নিৱাসী প্রয়াত ডিম্ব বৰা আৰু কল্পনা বৰাৰ জ্যেষ্ঠ সন্তান। ইফালে বৰাৰ এই সফলতা জামুগুৰিহাটৰ লগতে জিলাখনতে আনন্দৰ জোৱাৰ উঠাৰ লগতে বিভিন্ন অনুষ্ঠান-প্রতিষ্ঠানে অভিনন্দন জ্ঞাপন কৰিছে।

উৎসঃ দৈনিক জনমভূমি