চিৰাঙত অস্ত্ৰসহ চিকাৰী গ্ৰেপ্তাৰ

ডিজিটেল ডেস্কঃ চিৰাং জিলাৰ ভাৰত–ভূটান সীমান্তৱৰ্তী অঞ্চলৰ মালিভিটা ফৰেষ্ট বিটত যোৱা নিশা এক নির্ভৰযোগ্য তথ্যৰ ভিত্তিত ৰুণিখাতা আৰক্ষীয়ে অভিযান চলাই অস্ত্ৰসহ এজন চিকাৰীক গ্ৰেপ্তাৰ কৰিবলৈ সক্ষম হয়। 

চিৰাঙৰ জ্যেষ্ঠ আৰক্ষী অধীক্ষক ধ্ৰুৱ বৰাৰ পৰা পোৱা তথ্য অনুসৰি, জিলাখনৰ ৰুণিখাতা থানাৰ ভাৰপ্ৰাপ্ত বিষয়াই যোৱা নিশা বন্যপ্ৰাণীৰ অবৈধ চিকাৰৰ সন্দৰ্ভত নিৰ্ভৰযোগ্য ইনপুটৰ ভিত্তিত নিজৰ দলসহ আমগুৰি থানাৰ অন্তৰ্গত মালিভিটা ফৰেষ্ট বিটত এক বিশেষ অভিযান চলায়। উক্ত অভিযানত চিকাৰী ৰাকেব নাৰ্জাৰী (২৫)ক গ্ৰেপ্তাৰ কৰিবলৈ সক্ষম হয়।

গ্ৰেপ্তাৰ কৰা চিকাৰী ৰাকেব নাৰ্জাৰীৰ পৰা ২টা চিংগল-বেৰেল মাজল-লোডিং হাতেৰে বনোৱা ৰাইফল, ১টা কাঠৰ খাপ থকা খুকৰি চাকু,২টা মৃত ময়ূৰৰ মৃতদেহ, ১০০টা ময়ূৰৰ পাখি, সন্দেহজনক বিস্ফোৰক গুড়ি থকা ২টা প্লাষ্টিকৰ বটল, ২টা কণ্টেইনাৰ, গুলী হিচাপে ব্যৱহাৰ কৰিব পৰা ১৫৭টা সৰু বেয়াৰিং বল, আৰু গুলী হিচাপে ব্যৱহাৰযোগ্য ১০টা লোহাৰ পেলেটসহ বহু আপত্তিজনক সামগ্ৰী উদ্ধাৰ কৰা হয়। খবৰ লিখা সময়ত চিৰাং আৰক্ষীয়ে পৰৱৰ্তী আইনী ব্যৱস্থা আৰম্ভ কৰিছে।