ভাৰতীয় চিনেমাৰ ‘হিমেন’লৈ মৰণোত্তৰ সন্মান: ধৰ্মেন্দ্ৰলৈ ২০২৬ বৰ্ষৰ পদ্মবিভূষণ

ডিজিটেল ডেস্কঃ ভাৰতীয় চলচ্চিত্ৰ জগতৰ আকাশৰ পৰা এটা উজ্জ্বল তৰা খহি পৰিলেও, তেওঁৰ কৰ্মৰাজি আজিও অমৰ। ভাৰত চৰকাৰে বলীউডৰ কিংবদন্তি অভিনেতা ধৰ্মেন্দ্ৰলৈ দেশৰ দ্বিতীয় সৰ্বোচ্চ অসামৰিক সন্মান পদ্মবিভূষণ মৰণোত্তৰভাৱে আগবঢ়োৱাৰ কথা ঘোষণা কৰিছে।

এক যুগৰ অৱসান আৰু এক অনন্য স্বীকৃতি

ষাঠীৰ দশকৰ পৰা নব্বৈৰ দশকলৈকে বলীউডক নিজৰ বলিষ্ঠ অভিনয়েৰে শাসন কৰা ধৰ্মেন্দ্ৰ কেৱল এজন অভিনেতা নাছিল, তেওঁ আছিল লাখ লাখ মানুহৰ আৱেগ। ‘শ্ব'লে’ৰ বীৰুৰ পৰা আৰম্ভ কৰি ‘সত্যকাম’ৰ এজন নৈতিকতাবাদী ব্যক্তিৰ চৰিত্ৰলৈকে, তেওঁৰ অভিনয়ৰ পৰিসৰ আছিল অতি বিশাল। ভাৰতীয় চিনেমাৰ প্ৰতি তেওঁ আগবঢ়োৱা এই বিশাল অৱদানৰ বাবেই চৰকাৰে তেওঁক এই সন্মানেৰে বিভূষিত কৰিছে।

অনুৰাগীসকলৰ মতে, যদিও ধৰ্মেন্দ্ৰ আজি আমাৰ মাজত নাই, কিন্তু এই সন্মানে তেওঁৰ কৰ্মৰাজিক ৰাষ্ট্ৰীয় পৰ্যায়ত এক নতুন মৰ্যাদা প্ৰদান কৰিলে। বহুতো সমসাময়িক অভিনেতা আৰু পৰিচালকে চৰকাৰৰ এই সিদ্ধান্তক আদৰণি জনাইছে।

পত্নী হেমা মালিনীয়ে সামাজিক মাধ্যমত লিখিছে যে- মই অতি গৌৰৱান্বিত কিয়নো চলচ্চিত্ৰ জগতলৈ আগবঢ়োৱা অপৰিসীম অৱদানক স্বীকৃতি দি চৰকাৰে ধৰম জীক সন্মানীয় পদ্ম বিভূষণ বঁটাৰে সন্মানিত কৰিছে।

পদ্মবিভূষণৰ দৰে সন্মানীয় বঁটাই ধৰ্মেন্দ্ৰৰ সেই সুদীৰ্ঘ যাত্ৰাক পুনৰবাৰ সোঁৱৰাই দিছে, যিয়ে ভাৰতীয় সংস্কৃতিক চিনেমাৰ জৰিয়তে এক সুকীয়া পৰিচয় দিছিল। এই বঁটা তেওঁৰ কোটি কোটি অনুৰাগী আৰু তেওঁৰ পৰিয়ালৰ বাবে এক বিশেষ গৌৰৱৰ বিষয়।