ইৰান-ইজৰাইল যুদ্ধৰ কঁপনি ভাৰতীয় বজাৰত: চাবোনৰ পৰা বিস্কুটলৈকে সকলো সামগ্ৰীৰ দাম বৃদ্ধি হোৱাৰ সম্ভাৱনা

ডিজিটেল ডেস্কঃ বিশ্ব ৰাজনীতিৰ শেহতীয়া উত্তেজনাই এতিয়া প্ৰত্যক্ষ প্ৰভাৱ পেলাইছে সাধাৰণ গ্ৰাহকৰ পাকঘৰত।

ইৰান আৰু ইজৰাইলৰ মাজত চলি থকা সংঘাতৰ ফলত আন্তঃৰাষ্ট্ৰীয় বজাৰত খাৰুৱা তেলৰ মূল্য বৃদ্ধি পাইছে, যাৰ পোনপটীয়া প্ৰভাৱ পৰিছে ভাৰতৰ নিত্য ব্যৱহাৰ্য সামগ্ৰীৰ ওপৰত। 

চাবোন, বিস্কুট, খোৱা তেলৰ পৰা আৰম্ভ কৰি ঘৰত ব্যৱহাৰ কৰা ৰঙলৈকে সকলো সামগ্ৰীৰ দাম বৃদ্ধি কৰিবলৈ সাজু হৈছে দেশৰ অগ্ৰণী কোম্পানীসমূহ।

পেকেটবন্দী খাদ্য আৰু চাবোন তৈয়াৰ কৰাৰ বাবে 'পাম তেল' এক অপৰিহাৰ্য উপাদান। খাৰুৱা তেলৰ মূল্য বৃদ্ধিৰ লগে লগে পাম তেলৰ দৰো আকাশলংঘী হৈছে। ইয়াৰ ফলত ব্ৰিটানিয়া (Britannia), নেচলে (Nestle) আৰু বিকাজী (Bikaji)ৰ দৰে খাদ্য সামগ্ৰী উৎপাদনকাৰী প্ৰতিষ্ঠানসমূহৰ উৎপাদন ব্যয় বৃদ্ধি পাইছে। একেদৰে, হিন্দুস্তান ইউনিলিভাৰ (HUL) আৰু গ'ডৰেজৰ (Godrej) দৰে চাবোন নিৰ্মাতা কোম্পানীসমূহেও বৰ্ধিত খৰচৰ সৈতে মোকাবিলা কৰিবলৈ মূল্য বৃদ্ধিৰ পথ বাছি লৈছে।

বিশেষজ্ঞসকলৰ মতে, কোম্পানীসমূহে গ্ৰাহকৰ ওপৰত বোজা কমাবলৈ দুটা বিশেষ কৌশল অৱলম্বন কৰাৰ সম্ভাৱনা আছে:

পৰিমাণ হ্ৰাস: সৰু পেকেটবোৰৰ মূল্য একে ৰাখি সামগ্ৰীৰ ওজন কমাই দিয়া হ'ব (যেনে: ৫ টকীয়া বিস্কুটৰ পেকেটত বিস্কুটৰ সংখ্যা কম হ'ব)।

পোনপটীয়া মূল্য বৃদ্ধি: ডাঙৰ পেকেট বা পৰিয়ালৰ বাবে ব্যৱহৃত সামগ্ৰীসমূহৰ মূল্য পোনপটীয়াকৈ বৃদ্ধি কৰা হ'ব।

কেৱল খাদ্য বা প্ৰসাধন সামগ্ৰীয়ে নহয়, ৰং উদ্যোগতো ইয়াৰ ব্যাপক প্ৰভাৱ দেখা গৈছে। ৰং উৎপাদনত ব্যৱহাৰ হোৱা ৪০ শতাংশ কেঁচামাল খাৰুৱা তেলৰ ওপৰত নিৰ্ভৰশীল। জানিব পৰা মতে, এচিয়ান পেইণ্টছে (Asian Paints) অনাগত দিনত ৬-৮ শতাংশ পৰ্যন্ত দাম বৃদ্ধি কৰিব পাৰে। ইতিমধ্যে বাৰ্জাৰ পেইণ্টছ আৰু নেৰোলেকে মূল্য বৃদ্ধিৰ প্ৰক্ৰিয়া আৰম্ভ কৰিছে।

পশ্চিম এছিয়াৰ এই যুদ্ধ সদৃশ পৰিস্থিতি যিমানেই দীঘলীয়া হ’ব, বিশ্ব বজাৰত খাৰুৱা তেলৰ যোগান সিমানেই ব্যাহত হ’ব। ফলত আগন্তুক দিনত ভাৰতীয় গ্ৰাহকে নিত্য ব্যৱহাৰ্য সামগ্ৰীৰ বাবে অধিক ধন খৰচ কৰিবলগীয়া হোৱাটো প্ৰায় নিশ্চিত হৈ পৰিছে।