প্ৰেমত আইনী মোহৰ ; ছফী শ্বাইনৰ সৈতে বিবাহৰ আইনী পঞ্জীয়ন সম্পন্ন শিখৰ ধাৱানৰ

ডিজিটেল ডেস্কঃ ভাৰতীয় ক্ৰিকেট জগতৰ জনপ্ৰিয় তাৰকা শিখৰ ধাৱানে তেওঁৰ ব্যক্তিগত জীৱনৰ এক নতুন অধ্যায়ৰ আনুষ্ঠানিক ঘোষণা কৰিছে। শেহতীয়া খবৰ অনুসৰি, ধাৱানে তেওঁৰ পত্নী ছফী শ্বাইনৰ সৈতে সম্পন্ন হোৱা বিবাহক বুধবাৰে আইনী স্বীকৃতি প্ৰদান কৰে।

আদালতত আইনী প্ৰক্ৰিয়া সম্পন্ন

বুধবাৰে শিখৰ ধাৱান গুৰুগ্ৰামৰ 'বিকাশ সদন'স্থিত বিবাহ পঞ্জীয়কৰ কাৰ্যালয়ত উপস্থিত হয়। তাত তেওঁ আৰু ছফী শ্বাইনে আইনী নথিপত্ৰত স্বাক্ষৰ কৰি তেওঁলোকৰ বিবাহৰ পঞ্জীয়ন সম্পূৰ্ণ কৰে। এই বিশেষ মুহূৰ্তত ক্ৰিকেটাৰগৰাকীৰ পৰিয়ালৰ সদস্য আৰু অতি ঘনিষ্ঠ কেইগৰাকীমান বন্ধু উপস্থিত আছিল।

উল্লেখ্য যে, শিখৰ ধাৱান আৰু আয়াৰলেণ্ডৰ ছফী শ্বাইনে চলিত বৰ্ষৰ ২১ ফেব্ৰুৱাৰীত এক ব্যক্তিগত অনুষ্ঠানৰ জৰিয়তে বিবাহপাশত আৱদ্ধ হৈছিল। দিল্লী-এনচিআৰ অঞ্চলত অনুষ্ঠিত সেই বিবাহ অনুষ্ঠানটো অতি গোপনীয় কৰি ৰখা হৈছিল, য’ত কেৱল পৰিয়ালৰ লোকহে উপস্থিত আছিল। এতিয়া সেই বিবাহখনক তেওঁলোকে চৰকাৰীভাৱে পঞ্জীয়ন কৰি আইনী স্বীকৃতি দিলে।

ছফী শ্বাইন পেছাত এগৰাকী দক্ষ পৰামৰ্শদাতা । বৰ্তমান তেওঁ 'শিখৰ ধাৱান ফাউণ্ডেচন'ৰ বিভিন্ন জনকল্যাণমূলক কাম-কাজ পৰিচালনাৰ সৈতেও ওতঃপ্ৰোতভাৱে জড়িত।

মন কৰিবলগীয়া যে, ২০২৩ চনত শিখৰ ধাৱানৰ প্ৰথম পত্নী আয়েশা মুখাৰ্জীৰ সৈতে দীৰ্ঘদিনীয়া আইনী যুঁজৰ অন্তত বিবাহ বিচ্ছেদ হৈছিল। সেই তিক্ততাপূৰ্ণ অধ্যায়ৰ সমাপ্তিৰ পিছত ধাৱানৰ এই নতুন আৰম্ভণিয়ে অনুৰাগীসকলক উৎসাহিত কৰি তুলিছে।