বহনক্ষম উন্নয়ন, শীৰ্ষৰ ১০০ দেশৰ তালিকাত ভাৰত

ডিজিটেল ডেস্ক : বহনক্ষম উন্নয়নৰ লক্ষ্যত (এছ ডি জি) অগ্ৰসৰ হোৱা বিশ্বৰ শীর্ষ ১০০ খন দেশৰ মাজত স্থান লাভ কৰিছে ভাৰতে। ৰাষ্ট্ৰসংঘৰ ছাছটেইনেবল ডেভেলপমেন্ট ছলিউশ্যন নেটৱৰ্কৰ প্রতিবেদনত (এছ ডি আৰ) ভাৰতে প্ৰথমবাৰৰ বাবে ৬৭ পইন্ট লাভ কৰি ২০২৫ এছ ডি জি সূচকত ৯৯সংখ্যক স্থান লাভ কৰিছে।

মঙলবাৰে প্ৰকাশ কৰা ইউ এন এছ ডিৰ প্ৰতিবেদন অনুসৰি, ভাৰতৰ চুবুৰীয়া দেশ ভুটানে ৭০.৫ পইন্ট লাভ কৰি তালিকাত ৭৪সংখ্যক স্থান, নেপালে ৬৮.৬ পইন্ট লাভ কৰি ৮৫ স্থান, বাংলাদেশে ৬৩.৯ পইন্ট লাভ কৰি ১১৪ স্থান আৰু ৫৭ পইন্ট লাভ কৰি পাকিস্তানে ১৪০সংখ্যক স্থান লাভ কৰে। আনহাতে, ৭৫.২ পইন্ট লাভ কৰি আমেৰিকাই ৪৪ সংখ্যক স্থান আৰু ৭৪.৪ পইন্ট লাভ কৰি চীনে তালিকাত ৪৯সংখ্যক স্থান লাভ কৰে।

ভাৰতৰ সামুদ্রিক চুবুৰীয়া দেশ মালদ্বীপ আৰু শ্রীলংকাই তালিকাত ক্রমান্বয়ে ৫৩ আৰু ৯৩সংখ্যক স্থান লাভকৰে। প্ৰতিবেদনখনৰ প্ৰস্তুতকৰ্তাসকলে কয় যে ২০১৫ চনত ৰাষ্ট্ৰসংঘৰ দেশসমূহে নিৰ্ধাৰণ কৰা এই বহনক্ষম উন্নয়নৰ ১৭টা লক্ষ্যৰ কেৱল ১৭শতাংশইহে ২০৩০ চনৰ ভিতৰত বহনক্ষম উন্নয়ন প্রাপ্তিত উপনীত হ'ব পাৰিব। বিশ্ব স্তৰত নিৰ্ধাৰণ কৰা এই বহনক্ষম উন্নয়নৰ গতি মন্থৰ হৈ পৰিছে।

প্রতিবেদনখনৰ মুখ্য লেখক বিশ্ব প্রসিদ্ধ অর্থনীতিবিদ জেফৰীয়ে কয় যে সমগ্র বিশ্বত চলি থকা ভূ-ৰাজনৈতিক উত্তেজনা, সংঘর্ষ আৰু সীমিত বিত্তীয় সুবিধাই বিশ্বৰ বিভিন্ন প্রান্তত এছ ডি জিৰ বিকাশত বাধাৰ সৃষ্টি হৈছে। আনহাতে, নর্ডিক দেশসমূহ, বিশেষকৈ উত্তৰ ইউৰোপীয় দেশসমূহে এছ ডি জি সূচকত শীৰ্ষৰ স্থান বাহাল ৰাখিছে। বহনক্ষম উন্নয়নৰ লক্ষ্যৰ দিশে অগ্রগতিৰ তালিকাত ফিনলেণ্ডে প্রথম, ছুইডেনে দ্বিতীয় আৰু ডেনমার্কে তৃতীয় স্থান লাভ কৰিবলৈ সক্ষম হৈছে। তালিকাৰ শীৰ্ষৰ ২০খন দেশৰ ভিতৰত ১৯খনেই ইউৰোপীয় দেশ।

উৎসঃ দৈনিক জনমভূমি