কাটাৰত আৱদ্ধ ভাৰতীয়ৰ বাবে বিশেষ নিৰ্দেশনা জাৰি ভাৰতীয় দূতাৱাসৰ

ডিজিটেল ডেস্কঃ শেহতীয়াকৈ মধ্যপ্ৰাচ্যত সৃষ্টি হোৱা অস্থিৰ নিৰাপত্তা পৰিস্থিতিৰ প্ৰতি লক্ষ্য ৰাখি কাটাৰত থকা ভাৰতীয় দূতাৱাসে তাত বসবাস কৰি থকা ভাৰতীয় নাগৰিকসকলৰ বাবে এক জৰুৰীকালীন নিৰ্দেশনা জাৰি কৰিছে।

বৰ্তমানৰ উত্তেজনাপূৰ্ণ পৰিৱেশত ভাৰতীয়সকলৰ সুৰক্ষা নিশ্চিত কৰাই এই নিৰ্দেশনাৰ মূল উদ্দেশ্য।

গুৰুত্বপূৰ্ণ নিৰ্দেশনাসমূহ:

সুৰক্ষাবিধি পালন: কাটাৰ চৰকাৰ আৰু দেশখনৰ আভ্যন্তৰীণ মন্ত্ৰালয়ে (Ministry of Interior) সময় সাপেক্ষে জাৰি কৰা সকলো সুৰক্ষাজনিত নিৰ্দেশনা কঠোৰভাৱে পালন কৰিবলৈ ভাৰতীয় নাগৰিকসকলক আহ্বান জনোৱা হৈছে।

আৱাসস্থলত অৱস্থান: পৰিস্থিতি সুস্থিৰ নোহোৱালৈকে অতি প্ৰয়োজন নহ’লে ঘৰৰ বাহিৰলৈ নোলাবলৈ পৰামৰ্শ দিয়া হৈছে। লগতে খিৰিকী বা খোলা স্থানৰ পৰা আঁতৰত থাকিবলৈ কোৱা হৈছে।

যাতায়ত ব্যৱস্থা: বৰ্তমান কাটাৰৰ আকাশীপথ (Airspace) বন্ধ থকাৰ বাবে সকলো ধৰণৰ বিমান চলাচল স্থগিত আছে। যাত্ৰীসকলক নিজ নিজ বিমান সংস্থাৰ সৈতে যোগাযোগ কৰি যাত্ৰাৰ পৰিকল্পনা কৰিবলৈ জনোৱা হৈছে।

ভিছা সম্পৰ্কীয় নতুন নিয়ম:

কাটাৰৰ আভ্যন্তৰীণ মন্ত্ৰালয়ে জনোৱা অনুসৰি, যিসকল বিদেশী নাগৰিকৰ এণ্ট্ৰি ভিছা (Entry Visa) ইতিমধ্যে শেষ হৈছে বা হ’বলৈ ধৰিছে, তেওঁলোকৰ ভিছাৰ ম্যাদ স্বয়ংক্ৰিয়ভাৱে এমাহৰ বাবে বৃদ্ধি কৰা হৈছে। এই নিয়ম ২০২৬ চনৰ ২৮ ফেব্ৰুৱাৰীৰ পৰা কাৰ্যকৰী হোৱা বুলি গণ্য কৰা হ’ব।

স্থলপথেৰে যাত্ৰাৰ সুবিধা:

জৰুৰী অৱস্থাত কাটাৰ ত্যাগ কৰিব বিচৰা লোকসকলৰ বাবে 'চালৱা' (Salwa) স্থলসীমান্তৰ পথটো খোলা ৰখা হৈছে। যিসকল ভাৰতীয়ৰ ওচৰত আমেৰিকা যুক্তৰাষ্ট্ৰ, ব্ৰিটেইন বা স্কেঞ্জেন (Schengen) দেশৰ বৈধ ভিছা আছে, তেওঁলোকে চৌদি আৰবত উপস্থিত হোৱাৰ পাছত 'অন-এৰাইভেল ভিছা' (On-arrival Visa) লাভ কৰিব।