ইৰানৰ সুৰক্ষাৰ বাবে 'আণ্ডাৰগ্ৰাউণ্ড' মিছাইল চিটি

ডিজিটেল ডেস্ক : আমেৰিকা আৰু ইজৰাইল যদি পাৰমাণৱিক শক্তিৰে বলীয়ান, তেন্তে পাৰস্য উপ-সাগৰীয় দেশ ইৰানো কোনোগুণে কম নহয়। ইৰানৰ ভূগৰ্ভত আছে এখন 'মিছাইল মহানগৰ'।

বছৰ বছৰ ধৰি অক্লান্ত প্রচেষ্টাৰ অন্তত আয়াতুল্লা আলী খামেনেইৰ নেতৃত্বত ইৰানে দেশখনৰ মিছাইলৰ বৃহৎ ভাণ্ডাৰৰ সুৰক্ষাৰ বাবে ভূগর্ভত বৃহৎ বৃহৎ বাংকাৰ স্থাপন কৰিবলৈ সক্ষম হৈছিল। দেশখনৰ 'আণ্ডাৰগ্ৰাউণ্ড' এই বাংকাৰসমূহ মূলতঃ কেৰমানশ্বাহ, তাব্রিজ, ইছফাহান, চিৰাজ আদি অঞ্চলত স্থাপন কৰা হৈছিল। 

ইমানেই সুৰক্ষিত অৱস্থাত এই মিছাইলসমূহ ৰখা হৈছিল যে ইয়াক লোকচক্ষুৰ সন্মুখলৈ ননাকৈ ভূগৰ্ভৰ পৰাই নিক্ষেপ কৰাৰ ব্যৱস্থা আছিল। কিন্তু আমেৰিকা আৰু ইৰানৰ প্ৰচণ্ড আক্রমণে ইৰানৰ মিছাইল মহানগৰত বিপৰীত প্ৰভাৱ পেলাইছে। কাৰণ, উপগ্রহীয় তথ্যৰ ভিত্তিত শত্রু দেশ দুখনে ইৰানৰ ভূগৰ্ভত মিছাইল ৰখা বাংকাৰসমূহৰ দুৱাৰ মুখতেই মিছাইল আৰু ড্ৰ'নেৰে আক্রমণ চলাই গৈছে। 

যাৰ ফলত মিছাইল মহানগৰৰ পৰা মিছাইল নিক্ষেপত দেশখন বিফল হৈছে। কিন্তু ইৰানে শেহতীয়াকৈ চলাই থকা প্রত্যাক্রমণলৈ চাই মার্কিন বিশেষজ্ঞসকলে ঠাৱৰ কৰিছে যে দেশখনে হয়তো যুদ্ধৰ পূর্বে কিছু মিছাইল বাংকাৰৰ পৰা উলিয়াই আনি থৈছিল।

উৎসঃ দৈনিক জনমভূমি