১৪ ফেব্ৰুৱাৰীত অসমলৈ প্রধানমন্ত্রী,উদ্বোধন কৰিব গুৱাহাটী-উত্তৰ গুৱাহাটী সংযোগী দলং

ডিজিটেল ডেস্ক: পুনৰ অসম ভ্ৰমণলৈ আহিব প্রধানমন্ত্রী নৰেন্দ্ৰ মোদী। অহা ১৪ ফেব্ৰুৱাৰীত অসমলৈ আহি প্রধানমন্ত্রী মোদীয়ে ৩ হাজাৰ কোটি টকা ব্যয় সাপেক্ষে নিৰ্মাণ কৰা গুৱাহাটী-উত্তৰ গুৱাহাটী সংযোগী ছয়লেনযুক্ত দলঙৰ শুভ উদ্বোধন কৰি অসমবাসীলৈ উছর্গা কৰিব। 

উল্লেখযোগ্য যে ২০১৬ চনত বিজেপি অসমত শাসনলৈ অহাৰ পাছৰে পৰা যোৱা ১০ বছৰত ব্ৰহ্মপুত্ৰৰ ওপৰত নতুনকৈ ছয়খন দলঙৰ নিৰ্মাণকার্য সম্পূৰ্ণ হৈছে। ৫৫ বছৰ ধৰি অসমত ক্ষমতাত থকা পূৰ্বৰ কংগ্ৰেছ চৰকাৰে কেৱল তিনিখনহে দলং নিৰ্মাণ কৰিছিল। তাৰ বিপৰীতে বিজেপি চৰকাৰৰ নেতৃত্বত ব্ৰহ্মপুত্ৰৰ ওপৰত দলং নিৰ্মাণ কৰাই নহয়, এতিয়ালৈ ১ হাজাৰ কিল'মিটাৰতকৈ অধিক ৰাষ্ট্ৰীয় আৰু ৰাজ্যিক ঘাইপথ নির্মাণেৰে ৰাজ্যৰ যাতায়াত ব্যৱস্থাত আমূল পৰিৱৰ্তন সাধন কৰিছে। 

কালি এই কথা সদৰী কৰে ৰাজ্যিক বিজেপিয়ে। এক বিবৃতিত দলটোৱে অহা ১৪ ফেব্ৰুৱাৰীতেই ৰাজ্যিক বিজেপিয়ে ২০২৬ৰ বিধানসভা নিৰ্বাচনৰ প্ৰচাৰকাৰ্যৰ আনুষ্ঠানিকভাৱে আৰম্ভ কৰিব বুলি প্রকাশ কৰে। 

গুৱাহাটী খানাপাৰা পশু চিকিৎসা মহাবিদ্যালয় খেলপথাৰত ৰাজ্যৰ ৩০ হাজাৰতকৈও অধিক বুথৰ সভাপতিকে ধৰি ১ লাখকৈও অধিক কাৰ্যকৰ্তাৰ উপস্থিতিত প্রধানমন্ত্রী নৰেন্দ্ৰ মোদীয়ে সমাগত বিধানসভা নিৰ্বাচনৰ ৰণশিঙা বজাব। আনহাতে, কালি গুৱাহাটীৰ খানাপাৰা পশু চিকিৎসা মহাবিদ্যালয় খেলপথাৰৰ পৰা মুখ্যমন্ত্ৰী ড° হিমন্ত বিশ্ব শর্মাই বিজেপিৰ সংকল্প-পত্ৰ প্ৰস্তুতৰ বাবে পৰামৰ্শ গ্রহণ বাহনৰ শুভ উদ্বোধন কৰে। 

উক্ত অনুষ্ঠানত উপস্থিত থাকে ৰাজ্যিক বিজেপিৰ সভাপতি তথা দৰং-ওদালগুৰি লোকসভা সমষ্টিৰ সাংসদ দিলীপ শইকীয়া, ২০২৬ বিধানসভা নিৰ্বাচনৰ প্ৰভাৰী বৈজয়ন্তা জয় পাণ্ডা, নির্বাচনৰ আহ্বায়ক তথা লখিমপুৰ লোকসভা সমষ্টিৰ সাংসদ প্রদান বৰুৱা আৰু উত্তৰ-পূৰ্বাঞ্চলৰ বিজেপিৰ প্ৰভাৰী তথা সাংসদ সম্ভীত পাত্ৰ। ৰাইজে আগবঢ়োৱা প্ৰতিটো পৰামৰ্শক আদেশ হিচাপে লৈ ৰাজ্যিক বিজেপিয়ে আগন্তুক বিধানসভাৰ নিৰ্বাচনত জনতাৰ মাজলৈ গৈ সংকল্প-পত্ৰ প্ৰস্তুত কৰিব বুলিও বিবৃতিটোত প্রকাশ কৰে। আনহাতে, ৰাজ্যিক বিজেপিয়ে পৰামৰ্শ প্ৰেৰণৰ বাবে ৭০০২১২৬১২৬ ফ'ন নম্বৰ মুকলি কৰিছে।

উৎসঃ দৈনিক জনমভূমি