মাত্র ছয় মিনিটৰ যাত্ৰা! অচিৰেই কামাখ্যা ষ্টেছনৰ পৰা শক্তিপীঠ কামাখ্যালৈ হ’ব ৰ’প ৱে’

ডিজিটেল ডেস্ক: অসমবাসীৰ বাবে সুখবৰ। অচিৰেই কামাখ্যা ৰে’ল ষ্টেছনৰ পৰা শক্তিপীঠ কামাখ্যা মন্দিৰলৈ নিৰ্মাণ কৰা হ’ব এটা ৰ’প ৱে’। ২১৩.২৪ কোটি টকা ব্যয়েৰে আধুনিক প্রযুক্তি ব্যৱহাৰ কৰি নিৰ্মাণ কৰা হ’ব এই ৰ’প ৱে’। 

সামাজিক মাধ্যমযোগে এই কথা প্রকাশ কৰিছে কেন্দ্ৰীয় পথ পৰিবহণ আৰু ৰাষ্ট্ৰীয় ঘাইপথ দপ্তৰৰ মন্ত্ৰী নীতিন গাডকাৰিয়ে। কেন্দ্ৰীয় মন্ত্ৰীগৰাকীয়ে প্ৰকাশ কৰা মতে, এই ৰ’প ৱে’ৰে এদিনতে ১৬৫০০গৰাকী যাত্ৰীয়ে যাত্রা কৰিব পাৰিব। আনহাতে, ১.৪৩ কিল'মিটাৰ দৈৰ্ঘ্যৰ এই ৰ’প ৱে’ৰে কামাখ্যা মন্দিৰলৈ যোৱাৰ বাবে সময় লাগিব মাত্র ছয় মিনিট। সম্প্রতি কামাখ্যা ৰে'ল ষ্টেছনৰ পৰা কামাখ্যা মন্দিৰলৈ যোৱাৰ বাবে সময় লাগে বিছ মিনিট। 

উল্লেখযোগ্য যে ভাৰতৰ শক্তিপীঠসমূহৰ ভিতৰত গুৱাহাটীস্থিত কামাখ্যা মন্দিৰো অন্যতম। অসম চৰকাৰে কামাখ্যা মন্দিৰৰ বাবে বিশেষ পৰিকল্পনা হাতত লৈছে। সেই অনুসৰি বাৰাণসীৰ কাশী-বিশ্বনাথ মন্দিৰ কৰিডৰৰ আৰ্হিত গুৱাহাটীৰ কামাখ্যা মন্দিৰত এটা কৰিডৰ নিৰ্মাণৰো পৰিকল্পনা কৰিছে চৰকাৰে। ইয়াৰ ফলত তীর্থযাত্ৰীৰ বহুখিনি সুবিধা হ'ব। পিছে কৰিডৰৰ পূর্বেই মন্দিৰক সংযোগ কৰি নিৰ্মাণ কৰিবলগীয়া ৰ’প ৱে’ই কামাখ্যালৈ যাতায়াত ব্যৱস্থা সুচল কৰাই নহয়, পর্যটন ক্ষেত্ৰখনৰো উন্নয়ন যে কৰিব সেয়া নিশ্চিত।

উৎসঃ দৈনিক জনমভূমি