ডিমৌ-নিতাইপুখুৰী পথত দিনদুপৰতে দুৰ্বৃত্তই লুটি নিলে ১০ লক্ষাধিক টকা

ডিজিটেল ডেস্কঃ শিৱসাগৰত সংঘটিত হৈছে এক চাঞ্চল্যকৰ ঘটনা ।দিনদুপৰতে দুৰ্বৃত্তই লুটি নিলে বৃহৎ অংকৰ ধন । বেটাৰী ৰিক্সাত এজন ডাকঘৰৰ কৰ্মচাৰীয়ে কঢ়িয়াই নিছিল এই বৃহৎ অংকৰ ধন।কৰ্মচাৰী জনৰ লগত শিৱসাগৰৰ পৰা ডিমৌলৈ নাছিল কোনো সুৰক্ষা কৰ্মীৰ লোক ।ধন লৈ উধাও হোৱা দুই দুৰ্বৃত্তৰ সন্ধানত ডিমৌ আৰু নিতাইপুখুৰী আৰক্ষীৰ অভিযান

বিপুল দত্ত নামৰ শিৱসাগৰৰ ডাকঘৰৰ কেছ বিষয়াজনে শিৱসাগৰৰ পৰা নিতাইপুখুৰী ডাকঘৰলৈ বুলি নিছিল ১০ লক্ষাধিক টকা। ডিমৌৰ পৰা নিতাইপুখুৰীস্থিত ডাকঘৰৰ অভিমুখে বেটেৰী ৰিক্সাৰে গৈ থকা সময়তে বিপুল দত্তক ডিমৌৰ সমীপৰ ৰাইচাইত বাজাজ পালচাৰত অহা দুই দুৰ্বৃত্তই মাৰপিত কৰি কাঢ়ি লৈ যায় টকা ভৰ্তি বেগটো।

উল্লেখ্য যে ডাকঘৰৰ কেছ বিষয়া বিপুল দত্তই আন দিনটো এনেদৰে নগদ ধন জিলাখনৰ বিভিন্ন ডাকঘৰত দিয়াৰ ব্যৱস্থা কৰে। কিন্তু আনদিনাৰ দৰে আজি বিপুল দত্তৰ লগত কোনো সুৰক্ষা কৰ্মী নাছিল। আজি বিপুল দত্তৰ লগত ডাকঘৰৰ উৰ্দ্ধতন কতৃপক্ষই কোনো সুৰক্ষা কৰ্মী নপঠোৱাৰ ফলতে এই অনাকাংক্ষিত ঘটনা সংঘটিত হ'বলৈ পালে বুলি ক'ব পাৰি। কি পৰিস্থিতিত শিৱসাগৰ জিলা ডাকঘৰৰ উৰ্দ্ধতন কতৃপক্ষই কোনো সুৰক্ষা ব্যৱস্থা গ্ৰহণ নকৰাকৈ প্ৰায় ত্ৰিশ কিলোমিটাৰ পথ অতিক্ৰমি ইমান ডাঙৰ অংকৰ ধন কেৱল এজন ব্যক্তিৰ হাতত সৰবৰাহ কৰিছিল সেয়াও এক বিচাৰ্যৰ বিষয়।

বৰ্তমান ঘটনাস্থলীত নিতাইপুখুৰী আৰক্ষী উপস্থিত হৈ আৰম্ভ কৰিছে অভিযান। আৰক্ষীৰ তদন্তৰ অন্ততহে সমগ্ৰ ঘটনা পোহৰলৈ আহিব।