কালাইন হাস্পতালৰ জৰুৰী সেৱা আৰু এম্বুলেন্স ব্যৱস্থাৰ দুৰৱস্থাক লৈ স্থানীয় ৰাইজৰ ক্ষোভ

ডিজিটেল ডেস্কঃ সোমবাৰে পুৱা কাছাৰ জিলাৰ কালাইন উচ্চতৰ মাধ্যমিক বিদ্যালয়ৰ সন্মুখত ৰাষ্ট্ৰীয় ঘাইপথত সংঘটিত এক ভয়ংকৰ পথ দুৰ্ঘটনাত ষষ্ঠ শ্ৰেণীৰ ছাত্ৰ শেখৰ ৰায় গুৰুতৰভাৱে আহত হয়। 

দ্ৰুতগতিত অহা এখন মাৰুতি ভানে খুন্দা মৰাৰ ফলত মূৰত আঘাত পাই আৰু তেওঁ অজ্ঞান হৈ পথৰ দাঁতিতে পৰি যায়। স্থানীয় লোকে তৎক্ষণাৎ আহত ছাত্ৰজনক উদ্ধাৰ কৰি কালাইন হাস্পতাললৈ লৈ যায়। কিন্তু অৱস্থাৰ অধিক অৱনতি ঘটাত প্ৰাথমিক চিকিৎসাৰ পিছতে তেওঁক শিলচৰ মেডিকেল কলেজ আৰু হাস্পতাললৈ ৰেফাৰ কৰা হয়। 

উল্লেখযোগ্য যে কালাইন হাস্পতালৰ একমাত্ৰ এম্বুলেন্সখন বিকল হৈ থকাৰ বাবে প্ৰায় আধা ঘণ্টা সময় বিলম্ব হয়। অৱশেষত ব্যক্তিগত এম্বুলেন্সৰ জৰিয়তে তেওঁক শিলচৰলৈ প্ৰেৰণ কৰা হয়।

আহত শেখৰ ৰায় ভৈৰবপুৰ পাৰ্ট ১ অঞ্চলৰ বাসিন্দা। তেওঁৰ পিতৃৰ নাম শিপন ৰায়। এই ঘটনাক কেন্দ্ৰ কৰি সমগ্ৰ এলেকাত চাঞ্চল্যৰ সৃষ্টি হৈছে আৰু কালাইন হাস্পতালৰ জৰুৰী সেৱা তথা এম্বুলেন্স ব্যৱস্থাৰ দুৰৱস্থাক লৈ স্থানীয় ৰাইজে তীব্ৰ ক্ষোভ প্ৰকাশ কৰিছে।