ডিজিটেল ডেস্কঃ দক্ষিণ ভাৰতীয় চিনেমাৰ জনপ্ৰিয় তাৰকা যুটী বিজয় দেৱৰকোণ্ডা আৰু ৰশ্মিকা মান্দান্নাৰ বিবাহক লৈ এতিয়া দেশজুৰি চৰ্চা চলিছে।
উদয়পুৰত অতি গোপনীয়তাৰে বিবাহপাশত আৱদ্ধ হোৱাৰ পিছত, ৪ মাৰ্চত হায়দৰাবাদত অনুষ্ঠিত হ’বলগীয়া তেওঁলোকৰ অভ্যৰ্থনা অনুষ্ঠানক লৈ প্ৰস্তুতি তুংগত উঠিছে। বিশেষকৈ এই অনুষ্ঠানৰ নিৰাপত্তা ব্যৱস্থাই এতিয়া সকলোৰে দৃষ্টি আকৰ্ষণ কৰিছে।
জানিব পৰা মতে, ৰিচেপচন অনুষ্ঠানটোত নিৰাপত্তাৰ অতি কঠোৰ ব্যৱস্থা কৰা হৈছে। কোনো ধৰণৰ অপ্ৰীতিকৰ পৰিস্থিতি বা অনাহূত ভিৰ ৰোধ কৰিবলৈ আয়োজকসকলে এক বিশেষ নিৰাপত্তা আঁচনি প্ৰস্তুত কৰিছে।
নিমন্ত্ৰণী পত্ৰ বাধ্যতামূলক: অনুষ্ঠানস্থলীত প্ৰৱেশৰ বাবে বিশেষ 'এন্ট্ৰি কাৰ্ড' বা কিউআৰ কোড (QR Code) থকা নিমন্ত্ৰণী পত্ৰ থকাটো বাধ্যতামূলক কৰা হৈছে। বৈধ কাৰ্ড অবিহনে কোনো ব্যক্তিকে ভিতৰত প্ৰৱেশ কৰিবলৈ দিয়া নহয়।
নিৰাপত্তাৰক্ষীৰ মোতায়ন: অনুষ্ঠানৰ চৌপাশে শ শ ব্যক্তিগত নিৰাপত্তাৰক্ষীৰ লগতে বাউন্সাৰো মোতায়ন কৰা হ’ব।
ভিভিআইপি অতিথিৰ তালিকা
এই ৰিচেপচনত দেশৰ বহুতো গণ্য-মান্য ব্যক্তিৰ লগতে চলচ্চিত্ৰ জগতৰ তাৰকাসকল উপস্থিত থকাৰ সম্ভাৱনা আছে। খবৰ অনুসৰি, এই নৱ-দম্পতীয়ে দেশৰ প্ৰধানমন্ত্ৰী নৰেন্দ্ৰ মোদীকো তেওঁলোকৰ হায়দৰাবাদৰ অনুষ্ঠানলৈ আমন্ত্ৰণ জনাইছে। ইয়াৰ উপৰিও টলিউড আৰু বলীউডৰ বহু শীৰ্ষ পৰ্যায়ৰ তাৰকাই এই অনুষ্ঠানত অংশগ্ৰহণ কৰিব।
অনুৰাগীসকলে এতিয়া এই তাৰকা যুটীটোৰ বিবাহৰ আনুষ্ঠানিক ছবি আৰু ৰিচেপচনৰ চমক চাবলৈ অধীৰ আগ্ৰহেৰে অপেক্ষা কৰিছে।
Continue Reading
