ডিজিটেল ডেস্কঃ মধ্যপ্ৰাচ্যৰ যুদ্ধ এতিয়া কেৱল আকাশমাৰ্গ বা সীমান্ততে সীমাবদ্ধ হৈ থকা নাই। ই এতিয়া বিশ্বৰ ডিজিটেল মেৰুদণ্ডত আঘাত হানিবলৈ আগবাঢ়িছে।
শেহতীয়া এক চাঞ্চল্য্যকৰ খবৰ অনুসৰি, ইৰানে আমেৰিকাৰ প্ৰায় ১৮ টা বৃহৎ প্ৰযুক্তি প্ৰতিষ্ঠানক লক্ষ্য কৰি ল’বলৈ হুংকাৰ দিছে। এই তালিকাত আছে গুগল, এপল আৰু মেটাৰ দৰে বিশ্ববিখ্যাত কোম্পানী।
১ এপ্ৰিলত ইৰানৰ তৰফৰ পৰা এই সতৰ্কবাণী জাৰি কৰা হৈছে। ইয়াৰ পূৰ্বে বাহৰেইনত থকা আমাজনৰ ডাটা চেণ্টাৰত প্ৰভাৱ পৰা পৰিলক্ষিত হৈছিল। ইৰানৰ এই ভাবুকিৰ পাছতে এতিয়া সমগ্ৰ বিশ্বতে আতংকৰ সৃষ্টি হৈছে—যদি সঁচাকৈ এই 'বিগ টেক' কোম্পানীসমূহৰ চাৰ্ভাৰত আক্ৰমণ হয়, তেন্তে আমাৰ ডিজিটেল পৃথিৱীখনৰ কি হ’ব?
কেনেকৈ প্ৰভাৱিত হ’ব আপোনাৰ ফোনটো?
এই কোম্পানীসমূহ কেৱল একোটা এপ নহয়, বৰঞ্চ ই একোটা বিশাল ডিজিটেল তন্ত্ৰ। যদি ডাটা চেণ্টাৰত আঘাত পৰে,:
গুগল (Google): জিমেইল, ইউটিউব আৰু গুগল মেপছ সম্পূৰ্ণৰূপে বন্ধ বা লেহেমীয়া হৈ পৰিব।
মেটা (Meta): আপোনাৰ হোৱাটছএপ , ফেচবুক আৰু ইনষ্টাগ্ৰাম মুহূৰ্ততে অচল হৈ পৰিব পাৰে।
এপল (Apple): আইফোন ব্যৱহাৰকাৰীসকলৰ ডাটা বেকআপ, আইক্লাউড আৰু এপল পে’ সেৱাত যতি পৰিব।
বিশেষজ্ঞসকলৰ মতে, ইৰানে কেৱল ভৌতিক আক্ৰমণেই নহয়, বৰঞ্চ চাইবাৰ আক্ৰমণৰ ওপৰতহে বেছি গুৰুত্ব দিব পাৰে। ডাটা চেণ্টাৰৰ কুলিং চিষ্টেম বা বিদ্যুৎ সংযোগ বিচ্ছিন্ন কৰি দিলে চাৰ্ভাৰসমূহ অতিমাত্ৰা উত্তপ্ত হৈ আপোনাআপুনি বন্ধ হৈ যায়। ইয়াৰ উপৰি সাগৰৰ তলত থকা ইণ্টাৰনেট কেবলসমূহক লক্ষ্য কৰি ল’লেও সমগ্ৰ মহাদেশ এখনৰ ইণ্টাৰনেট বিচ্ছিন্ন হ’ব পাৰে।
অৰ্থনীতি আৰু ব্যৱহাৰকাৰীৰ ওপৰত প্ৰভাৱ
চেইন ৰিয়েকচন: যদি এটা ডাটা চেণ্টাৰ বন্ধ হয়, তেন্তে তাৰ বোজা আন এটা কেন্দ্ৰৰ ওপৰত পৰে। অত্যাধিক হেঁচাত এটাৰ পাছত আনটোকৈ চাৰ্ভাৰ বিকল হোৱাৰ সম্ভাৱনা থাকে ।
আৰ্থিক লোকচান: অনলাইন পেমেন্ট (UPI), বেংকিং সেৱা, শ্বেয়াৰ বজাৰ আৰু ই-কমাৰ্চ ব্যৱসায় মুহূৰ্ততে স্তব্ধ হৈ পৰিব।
ভাৰতৰ বাবে ই কিমান উদ্বেগজনক?
ভাৰতীয় ব্যৱহাৰকাৰীসকলৰ বাবে ই অতি ভয়ংকৰ হ’ব পাৰে। ভাৰতৰ সৰু দোকান এখনৰ পৰা ডাঙৰ ব্যৱসায়ীজনলৈকে সকলোৱে আজি হোৱাটছএপ বা গুগল পে’-ৰ ওপৰত নিৰ্ভৰশীল। যদি এই সেৱাসমূহ কিছু ঘণ্টাৰ বাবেও বন্ধ হয়, তেন্তে দেশৰ অৰ্থনীতিত কোটি কোটি টকাৰ ক্ষতি হোৱাৰ লগতে জনসাধাৰণৰ স্বাভাৱিক জীৱনযাত্ৰা ব্যাহত হ’ব।
ইৰানৰ এই ভাবুকি এতিয়া কেৱল দুখন দেশৰ মাজৰ সংঘাত হৈ থকা নাই, ই এক বিশ্বজুৰি 'ডিজিটেল দুৰ্যোগ'ৰ সংকেত দিছে। যদিহে গুগল বা মেটাৰ দৰে প্ৰতিষ্ঠানৰ ডাটা চেণ্টাৰ সুৰক্ষিত নহয়, তেন্তে ইণ্টাৰনেটৰ যুগৰ এই মানুহবোৰ এক বৃহৎ প্ৰত্যাহ্বানৰ মুখত পৰাটো নিশ্চিত।
Continue Reading
