আফগান প্ৰতিৰক্ষা মন্ত্ৰীৰ বিৰুদ্ধে তালিবানৰ বোমা আক্ৰমণ

কাবুল : আফগানিস্তানৰ পৰিস্থিতিৰ অধিক অৱনতি ঘটিছে। তালিবান সন্ত্ৰাসবাদীৰ আগ্ৰাসন বৃদ্ধি পোৱাৰ পাছত দেশখনত হিংসা বৃদ্ধি পাইছে ব্যাপক ৰূপত। আফগান চৰকাৰৰ নেতাৰ বিৰুদ্ধে এইবাৰ অধিক আক্ৰমণ সংঘটিত কৰাৰ হুংকাৰ দিছে তালিবান সন্ত্ৰাসবাদীয়ে। আফগানিস্তানৰ প্ৰতিৰক্ষা মন্ত্ৰীৰ ওপৰত ভয়ংকৰ আক্ৰমণ চলাই প্ৰবল ৰক্তক্ষয়ৰ ইংগিত দিছে তালিবানে।

তালিবানৰ এক ভয়ংকৰ আক্ৰমণৰ পৰা কথমপি প্ৰাণৰক্ষা কৰাৰ এদিনৰ পাছতে এই সতৰ্কবাণী জাৰি কৰিছে তালিবানে। বুধবাৰে এই সতৰ্কবাণী জাৰি কৰে তালিবানে। মাৰ্কিন সেনাই দেশখনত অভিযান সামৰাৰ পাছতে এতিয়া তালিবানে দেশখনত নিজৰ নিয়ন্ত্ৰণ সাব্যস্ত কৰিবলৈ প্ৰবল চেষ্টা চলাইছে। দেশখনৰ বিভিন্ন ঠাইত আফগান সামৰিক বাহিনী আৰু তালিবানৰ মাজত যুদ্ধ চলি থকাৰ সময়তে মঙলবাৰে দেশখনৰ প্ৰতিৰক্ষা মন্ত্ৰী বিছমিল্লাহ মোহম্মদীৰ ওপৰত বোমা আক্ৰমণ চলোৱাৰ লগতে প্ৰৱল গুলীবৰ্ষণ কৰে তালিবানে।

ইয়াৰ পাছতে তালিবান সন্ত্ৰাসবাদীয়ে এক বিজ্ঞপ্তি জাৰি কৰিছে ইয়াক চৰকাৰৰ বিৰুদ্ধে তীব্ৰ অভিযানৰ আৰম্ভণিহে বুলি অভিহিত কৰে। দেশখনৰ বিভিন্ন প্ৰান্তত বোমা বৰ্ষণেৰে আক্ৰমণ চলাবলৈ নিৰ্দেশ দিয়া চৰকাৰৰ প্ৰতিনিধিৰ বিৰুদ্ধে প্ৰতিশোধ ল’বলৈ আৰু অধিক অনুৰূপ আক্ৰমণ চলোৱাৰ হুংকাৰ দিছে মৌলবাদী সন্ত্ৰাসবাদী সংগঠনটোৱে।