বান গ’ল, কিন্তু শেষ হোৱা নাই দুৰ্ভোগ; নৰক যন্ত্ৰণা, আৱৰ্জনা, দুৰ্গন্ধ আৰু ৰোগৰ আতংকত জোনাইৰ মধুপুৰ-অৰুণ চাপৰি ৰাইজ

ডিজিটেল ডেস্ক: বানপানী আঁতৰি গ’ল যদিও জোনাইৰ মধুপুৰ-অৰুণ চাপৰি অঞ্চলত এতিয়াও স্বাভাৱিক হোৱা নাই জনজীৱন। ঘৰৰ চাৰিওফালে আজিও বানত ভাঁহি অহা কাঠ, জাবৰ-জোঁট আৰু আৱৰ্জনাৰ দমে দমে স্তুপ। সেই আৱৰ্জনাৰ পৰা ওলোৱা দুৰ্গন্ধই সমগ্ৰ অঞ্চলটো দুৰ্গন্ধময় কৰি তুলিছে। এই অস্বাস্থ্যকৰ পৰিৱেশে জনস্বাস্থ্যৰ প্ৰতি গুৰুতৰ ভাবুকি কঢ়িয়াই আনিছে। শিশুৰ পৰা বৃদ্ধলৈকে বহু লোক জ্বৰ, চৰ্মৰোগ, ডায়েৰিয়া আদি বিভিন্ন ৰোগে দেখা দিয়া জানিবলৈ দিছে স্থানীয় ৰাইজে।

আনহাতে বানপানী আঁতৰি গ'লেও এতিয়াও বোকা-পলসে আৱৰি ধৰি আছে ঘৰৰ চোতাল, পথাৰ, কৃষিভূমি। ব্যাহত হৈ আছে যাতায়ত ব্যৱস্থা। সমান্তৰালকৈ বিশুদ্ধ খোৱা পানীৰ সংকটে বানাক্ৰান্ত লোকসকলৰ মাজত তীব্ৰ সমস্যাই দেখা দিছে।

ইফালে ৰাইজে অভিযোগ কৰিছে যে, যেতিয়া বানে অঞ্চলটো তচনচ কৰিছিল, তেতিয়া মন্ত্ৰী, বিধায়ক, জনপ্ৰতিনিধি, স্বাস্থ্যকৰ্মী আৰু চৰকাৰী বিষয়া কৰ্মচাৰীৰ লানি নিছিগা ভিৰ আছিল, ক্ষতিগ্ৰস্ত পৰিয়ালসমূহক শীঘ্ৰে পুনৰসংস্থাপন, উচিত ক্ষতিপূৰণ আৰু সকলো ধৰণৰ সহায় আগবঢ়োৱাৰ প্ৰতিশ্ৰুতি দিয়া হৈছিল। কিন্তু আজি বানপানী আঁতৰি যোৱাৰ পিছতে সেই প্ৰতিশ্ৰুতিবোৰো পানীৰ সোঁতত উটি গ'ল। 

বানৰ সময়ত নিয়মীয়াকৈ খবৰ লোৱা বহু জনপ্ৰতিনিধি, স্বাস্থ্যকৰ্মী আৰু চৰকাৰী বিষয়া-কৰ্মচাৰী এতিয়া এগৰাকীও বানাক্ৰান্ত ৰাইজৰ খবৰ ল’বলৈ আহৰি নাই বুলি গুৰুতৰ অভিযোগ উত্থাপন কৰিছে বানাক্ৰান্ত ৰাইজে।

এতিয়া মাথোঁ পুনৰসংস্থাপন, স্বাস্থ্য সুৰক্ষা লগতে উচিত ক্ষতিপূৰণৰ বাবে চৰকাৰৰ বাস্তৱ পদক্ষেপৰ অপেক্ষাত আছে হাজাৰ হাজাৰ এইসকল মধুপুৰ অৰুণ চাপৰি বানাক্ৰান্ত ৰাইজে।