ডিজিটেল ডেস্ক: বজালীৰ অকয়া গৰখীয়া গোঁহাই ঘাটত শোকাৱহ অঘটন। কালদিয়া নৈ পাৰ হ’বলৈ গৈ উটি গ’ল বৃদ্ধ কৃষক। উদ্ধাৰ অভিযান অব্যাহত আছে।
বজালী জিলাৰ অকয়া গৰখীয়া গোঁহাই ঘাটত আজি এক শোকাৱহ ঘটনা সংঘটিত হয়। কালদিয়া নৈ পাৰ হৈ নিজৰ খেতিপথাৰলৈ যাবলৈ ওলাই যোৱা এগৰাকী বৃদ্ধ কৃষক নৈৰ প্ৰবল সোঁতত উটি যোৱাত সমগ্ৰ অঞ্চলটোত চাঞ্চল্যৰ সৃষ্টি হৈছে।
উটি যোৱা কৃষকজন অকয়া গাঁৱৰ বাসিন্দা নীলকান্ত দাস (৭২) বুলি জানিব পৰা গৈছে। পৰিয়ালৰ লোকে জনোৱা মতে, নীলকান্ত দাসে প্ৰতিদিনে একে পথেদি কালদিয়া নৈ পাৰ হৈ নিজৰ খেতিপথাৰলৈ যাতায়াত কৰিছিল।
আজি তেওঁ প্ৰতিদিনৰ দৰেই খেতিপথাৰলৈ ওলাই গৈছিল। কিন্তু নৈ পাৰ হোৱাৰ সময়তে হঠাতে প্ৰবল সোঁতত ভাহি যায়।
ঘটনাৰ খবৰ লাভ কৰাৰ লগে লগে স্থানীয় ৰাইজ ঘটনাস্থলীত ভিৰ কৰে আৰু পাটাছাৰকুছি আৰক্ষীক অৱগত কৰে। কিছু সময়ৰ ভিতৰতে আৰক্ষীৰ দল আৰু ৰাজ্যিক দুৰ্যোগ বাহিনী (SDRF)-ৰ জোৱানসকল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে।
SDRF-ৰ দলে নৈৰ বিভিন্ন অংশত ব্যাপক অনুসন্ধান চলাই আছে যদিও এই পৰ্যন্ত কৃষকজনক উদ্ধাৰ কৰিবলৈ সক্ষম হোৱা নাই। ঘটনাটোৱে সমগ্ৰ অঞ্চলটোত শোকৰ ছাঁ পেলাইছে।
Continue Reading
