ডিজিটেল ডেস্কঃ জীৱন-মৃত্যুৰ সন্ধিক্ষণত পাকিস্তানৰ কিংবদন্তী ক্ৰিকেটাৰ জহীৰ আব্বাছ। কৰ’নাক্ৰান্ত হোৱাৰ পাছত ইংলেণ্ডৰ পেডিংটনস্থিত ছেইণ্ট মেৰীজ হাস্পতালত ভৰ্তি কৰোৱা হৈছিল জহীৰ আব্বাছক। মঙলবাৰে তেওঁৰ স্বাস্থ্যৰ অধিক অৱনতি ঘটাত আইচিইউত ভৰ্তি কৰোৱা হয়।
মন কৰিবলগীয়া যে, ডুবাইৰ পৰা লণ্ডনলৈ যোৱাৰ পথত কৰ’নাত আক্ৰান্ত হৈছিল জহীৰ আব্বাছ। লণ্ডনত উপস্থিত হোৱাৰ লগে লগে তেওঁৰ বৃক্কত বিষ অনুভৱ হয়। নিউমোনিয়াও ধৰা পৰে।
জহীৰ আব্বাছৰ পৰিয়ালে প্ৰাক্তন ক্ৰিকেটাৰগৰাকীৰ আশু আৰোগ্যৰ বাবে প্ৰাৰ্থনা কৰিবলৈ অনুৰোধ জনাইছে সকলোকে।
স্মৰ্তব্য যে, ১৯৬৯ চনৰ পৰা ১৯৮৫ চনলৈ ১৬ বছৰীয়া আন্তঃৰাষ্ট্ৰীয় কেৰিয়াৰত জহীৰ আব্বাছে পাকিস্তানৰ হৈ ৭৮ খন টেষ্ট আৰু ৬২ খন এদিনীয়া খেল খেলিছিল। ২০টা অৰ্ধশতক আৰু ১২টা শতককে ধৰি টেষ্ট ক্ৰিকেটত ৫০৬২ ৰানৰ বিপৰীতে এদিনীয়াত ৭টা শতকীয় ইনিংছ আৰু ১৩টা অৰ্ধশতক আছে এইগৰাকী ক্ৰিকেটাৰৰ নামত। এদিনীয়াত তেওঁৰ মুঠ ৰান ২৫৭২।
প্ৰথম শ্ৰেণীৰ ক্ৰিকেটত ৩৫ হাজাৰ ৰান সংগ্ৰহ কৰিছিল জহীৰ আব্বাছে। প্ৰথম শ্ৰেণীৰ ক্ৰিকেটত শতক অৰ্জন কৰা এছিয়াৰ একমাত্ৰ বেটছমেন হিচাপে কৃতিত্ব অৰ্জন কৰিছিল তেওঁ। সেইবাবে এছিয়াৰ ব্ৰেডমেন বুলিও অভিহত কৰা হয় জহীৰ আব্বাছক।
Continue Reading
