ৰাজধানী ‘কাবুল’ক লৈ উদ্বিগ্ন আফগান সেনা, সীমান্তত তালিবানৰে তীব্ৰ যুঁজ

কাবুলঃ আফগানিস্তানৰ আতংকিত অধ্যায়ে হতচকিত কৰি তুলিছে সমগ্ৰ বিশ্বক। ৯০ দশকৰ তালীবানী উপদ্ৰৱে পুনৰ জোকাৰি গৈছে আফগানিস্তান অধিকৃত প্ৰতিটো অঞ্চল। ক্ৰমাৎ অস্থিৰ হৈ পৰিছে আফগানিস্তানৰ পৰিৱেশ। প্ৰাণৰ মমতাত পলায়ন কৰিছে হাজাৰ-হাজাৰ আফগান নাগৰিকে। খাদ্য সংকটৰ প্ৰৱণতাও অবাধ গতিত বৃদ্ধি পাবলৈ লৈছে। শিশু,বৃদ্ধা,মহিলাৰ উপৰি অন্যান্য নাগৰিকে অকাল মৃত্যুক আঁকোৱালি লৈছে। প্ৰণিধানযোগ্য যে, আমেৰিকা যুক্তৰাষ্ট্ৰই সামৰিক বাহিনী প্ৰত্যাহাৰ কৰাৰ পাছতে আফগানিস্তানত তালিবানী সংগঠনটোৰ স্বৈৰাচাৰী শাসনৰ প্ৰভূত বিস্তাৰ হোৱা পৰিলক্ষিত হৈছে।

আফগানিস্তানৰ চৰকাৰী বাহিনীয়ে বৃহস্পতিবাৰে কেইবাখনো নগৰ তথা চহৰাঞ্চল আৰু ইয়াৰ আশে-পাশে বাহৰ পাতি থকা তালিবানী যোদ্ধাসকলৰ সৈতে তীব্ৰ যুঁজত অৱতীৰ্ণ হৈছে। তথাপি তালিবানী আগ্ৰাসনক প্ৰতিহত কৰিব পৰা নাই আফগান সেনাই। ইফালে আগন্তুক ৯০ দিনৰ ভিতৰত তালিবানী সংগঠনটোৱে আফগানিস্তানৰ ৰাজধানী কাবুল দখল কৰিব পাৰে বুলিও শেহতীয়াকৈ আমেৰিকা যুক্তৰাষ্ট্ৰৰ চোৰাংচোৱা সংস্থাই সদৰী কৰিছে।

উল্লেখ্য যে, এসপ্তাহতকৈয়ো কম সময়ৰ ভিতৰত ৮খন প্ৰাদেশিক ৰাজধানী দখল কৰা তালিবানে আৰু কমেও ৩খন প্ৰাদেশিক ৰাজধানী দখল কৰাৰ ভাবুকি প্ৰদান কৰাৰ সময়তে আমেৰিকা চোৰাংচোৱাৰ শেহতীয়া তথ্যই উদ্ৰেগ বৃদ্ধি কৰিছে। আফগানিস্তানৰ লগতে বিশ্বৰ বিভিন্ন প্ৰান্তত জ’ বাইডেনৰ নেতৃত্বত আমেৰিকা যুক্তৰাষ্ট্ৰই সৈন্য প্ৰত্যাহাৰ তথা অকলে যুঁজিবলৈ আফগান চৰকাৰক এৰি দিয়া সিদ্ধান্তৰ তীক্ষ্ণ সমোলোচনাৰ সন্মুখীন হোৱা দেখিবলৈ পোৱা গৈছে।