ডিজিটেল ডেস্ক : আন্তঃৰাষ্ট্ৰীয় মহাকাশ কেন্দ্রত প্রায় ৯ মাহ আবদ্ধ হৈ থকাৰ পাছত আমেৰিকাৰ মহাকাশচাৰীদ্বয় সুনীতা উইলিয়ামছ আৰু বুচ্চউইলম'ৰ আজি সন্ধিয়া পৃথিৱীলৈ উভতি আহিব।
আমেৰিকাৰ মহাকাশ গৱেষণা সংস্থা নাছাই এই কথা প্রকাশ কৰে। নাছাই কালি এটা বিবৃতিত কয় যে তেওঁলোকক লৈ অহা স্পেচএক্সৰ ক্রু ড্রেগন মহাকাশযানখনে আমেৰিকাৰ ফ্লৰিডা উপকূলত আজি সন্ধিয়া (স্থানীয় সময়মতে) ৫-৫৭ বজাত (ভাৰতীয় সময়মতে কাইলৈ শেষ নিশা ৩-৩০ বজা) অৱতৰণ কৰিব।
তেওঁলোকৰ লগত ৰাছিয়াৰ এজন মহাকাশচাৰীও আহিব। উল্লেখযোগ্য যে উইলিয়ামছ আৰু উইলম'ৰ যোৱা বছৰ জুনত আন্তঃৰাষ্ট্ৰীয় মহাকাশ কেন্দ্রলৈ গৈছিল। তেওঁলোক বয়িং ষ্টাৰলাইনাৰ যানত আন্তঃৰাষ্ট্ৰীয় মহাকাশ কেন্দ্রত উপস্থিত হৈছিল, কিন্তু যানখনত দেখা দিয়া বিজুতিৰ বাবে তেওঁলোক উভতি অহাত সমস্যাৰ সৃষ্টি হয়। ফলত তেওঁলোক আন্তঃৰাষ্ট্ৰীয় মহাকাশ কেন্দ্রত প্রায় ৯ মাহ আবদ্ধ হৈ থাকিবলগীয়া হয়। নাছাই প্ৰকাশ কৰা অনুসৰি সুনীতাৰ পৃথিৱীলৈ প্ৰত্যাৱৰ্তনৰ সময় এনেদৰে নিৰ্ধাৰণ কৰা হৈছে যে মহাকাশ কেন্দ্ৰৰ দলটোৱে তাত নিজৰ সকলো কাম সম্পূৰ্ণ কৰি আহিব পাৰে।
নাছাই লগতে প্রকাশ কৰে যে ড্রেগন মহাকাশযানখনৰ পৃথিৱীলৈ প্ৰত্যাৱৰ্তনৰ পোনপটীয়া সম্প্ৰচাৰ কৰা হ'ব। এই সম্প্ৰচাৰ আজি পুৱা ৮-৩০ বজাৰ পৰা আৰম্ভ হয়। নাছাৰ মহাকাশচাৰী নিক হেগ আৰু ৰাছিয়াৰ মহাকাশচাৰী আলেকজেণ্ডাৰ গ'ৰবুনভো ড্রেগন কেপছুলত পৃথিৱীলৈ উভতি আহিব। উল্লেখযোগ্য যে সুনীতা আৰু উইলম'ৰ মাত্ৰ কেইদিনমানৰ বাবে মহাকাশ কেন্দ্রটোলৈ গৈছিল।
উৎস- দৈনিক জনমভূমি
Continue Reading
