আজিৰেপৰা ভেকচিনৰ বুষ্টাৰ পালি প্ৰদান প্ৰক্ৰিয়া আৰম্ভ

ডিজিটেল ডেস্ক : অ’মিক্ৰনৰ সংক্ৰমণ বৃদ্ধিৰ মাজতে আজিৰে পৰা দেশত আৰম্ভ কৰা হ’ব ক’ভিডৰ ‘বুষ্টাৰ পালি’ প্ৰদান প্ৰক্ৰিয়া৷ নতুন প্ৰাদুৰ্ভাৱ নিয়ন্ত্ৰণৰ বাবে সোমবাৰৰ পৰা প্ৰদান কৰিব ‘বুষ্টাৰ পালি’। প্ৰথম শাৰীৰ কৰ’না যোদ্ধা, চিকিৎসক তথা স্বাস্থ্যকৰ্মী আৰু ৬০ বছৰৰ বয়সৰ ঊৰ্ধ্বৰ কোম’ৰ্বিডিটি থকা ৰোগীক প্ৰথমতে এই বুষ্টাৰ ড’জ প্ৰদান কৰা হ’ব। কেন্দ্ৰই ইতিমধ্যে ৩ জানুৱাৰীত ১৫-১৮ বছৰ বয়সৰ শিশুৰ বাবে টিকাকৰণ আৰম্ভ কৰিছে।

সোমবাৰে কেন্দ্ৰীয় স্বাস্থ্য-মন্ত্ৰালয়ে প্ৰকাশ কৰা তথ্য অনুসৰি বিগত ২৪ ঘণ্টাত দেশত মুঠ কৰ’নাত আক্ৰান্ত হৈছে ১লাখ ৭৯ হাজাৰ ৭২৩ জন লোক। দেওবাৰে দেশত মুঠ কৰ’নাত আক্ৰান্ত হৈছিল ১লাখ ৫৯ হাজাৰ ৬৩২ জন লোক। দেশত মুঠ অ’মিক্ৰনত আক্ৰান্তৰ সংখ্যা হৈছেগৈ ৪হাজাৰ ৩জন। দেওবাৰৰ তুলনাত দেশত সংক্ৰমণৰ হাৰ ১২.৬ শতাংশ বৃদ্ধি পাইছে। লগতে কৰ’নাত মুঠ ১৪৬ জন লোকৰ মৃত্যু ঘটিছে।

দেশত মুঠ কৰ’নাত আক্ৰান্ত হোৱা লোকৰ সংখ্যা ৩কোটি ৫৭লাখ ৭হাজাৰ ৭২৭জন হৈছে আৰু মৃত্যু হৈছে ৪ লাখ ৮৩হাজাৰ ৯৩৬ জনৰ। দেশত চিকিৎসাধীন হৈ থকা কৰ’না ৰোগীৰ সংখ্যা বৰ্তমান ৭লাখ ২৩ হাজাৰ ৬১৯ জন।