চেন্নাই : চলচ্চিত্ৰত তেওঁৰ কাৰণে অসাধ্য বুলি একো নাই। চমৎকাৰিত্বৰে আন এটা নাম তেওঁ। তেওঁ ভাৰতীয় ছবিজগতৰ মহাতাৰকা থালাইৱা, ৰজনীকান্ত। পিছে এইবাৰ তেওঁ হাৰ মানিলে। কোনো প্ৰতিবন্ধকতাকে স্বীকাৰ কৰিবলৈ অস্বীকাৰ কৰি থালাইৱাই এইবাৰ থমকি ৰ’ল নিজৰ এটা পদক্ষেপত। ৰাজনীতিৰ পথাৰৰ পৰা তেওঁ আঁতৰি থকাৰ সিদ্ধান্তৰ কথা আজি প্ৰকাশ কৰিছে।
কেইবামাহো স্বাস্থ্যজনিত কাৰণত ৰাজনীতিৰ পৰা আঁতৰি থকাৰ পাছত তেওঁ নিজৰ এই সিদ্ধান্ত অটুট ৰখাৰ কথা প্ৰকাশ কৰিছে। তেওঁ নিজৰ সংগঠন ৰজনী মাক্কাল মন্দৰাম (Rajini Makkal Mandram) ভংগ কৰি দিয়াৰ কথাও প্ৰকাশ কৰে। তেওঁ কয়, ‘ভৱিষ্যতে ৰাজনীতিত প্ৰৱেশ কৰাৰ মোৰ কোনো পৰিকল্পনা নাই। ৭০ বছৰীয়া তাৰকাগৰাকীয়ে আজি তেওঁৰ ফ’ৰামৰ সদস্যসকলক শেষবাৰৰ বাবে সাক্ষাৎ কৰাৰ পাছত এই সিদ্ধান্তৰ কথা প্ৰকাশ কৰে।
দ্য ৰজনী মাক্কাল মন্দৰাম ২০১৮ চনত গঠন কৰা হৈছিল। এতিয়া ইয়াক ভংগ কৰি দি ইয়াক ৰজনী ৰাছিগাৰ নাৰপানী মন্দৰাম অৰ্থাৎ ‘ৰজনী ফেনছ ৱেলফেয়াৰ ফ’ৰাম’ ৰূপে নতুনকৈ গঢ় দিয়া হ’ব। এই আনুষ্ঠানিক ঘোষণাৰ পাছতে ৰজনীকান্তে ৰাজনীতিত যোগ দিয়া নিদিয়াক লৈ চলি থকা জল্পনা-কল্পনাৰো অন্ত পৰিল।
Continue Reading
