ডিজিটেল ডেস্কঃ তাচপাতৰ ঘৰৰ দৰে খহি পৰিল এখন বিশাল দলং। আমেৰিকা যুক্তৰাষ্ট্ৰৰ মেৰিলেণ্ডৰ বাল্টিমোৰত এখন মালবাহী জাহাজৰ খুন্দাত দলংখন খহি পৰে। ফ্ৰান্সিছ স্কট ব্ৰীজ আমেৰিকাৰ অন্যতম বিখ্যাত দলং। এই দুৰ্যোগৰ ফলত বহুলোকে প্ৰাণ হেৰুওৱাৰ আশংকা কৰা হৈছে। সংবাদ মাধ্যমৰ বাতৰি অনুসৰি দলংখন খহি পৰাৰ লগে লগে বহুতো গাড়ী আৰু মানুহ পানীত পৰে।
খবৰ অনুসৰি জাহাজখনে বাল্টিমোৰ বন্দৰ এৰি যোৱাৰ সময়তে দুৰ্ঘটনাটো ঘটিছিল । জাহাজ খনে এখন দলঙত খুন্দা মাৰিছিল। লগে লগে পাটাপস্কো নদীত বিশাল দলংখন খহি পৰে। এই দুৰ্ঘটনাৰ পিছত জাহাজখনো দলঙৰ ধ্বংসস্তুপৰ মাজত আবদ্ধ হৈ পৰে। স্থানীয় সময় অনুসৰি মঙলবাৰে পুৱা দুৰ্ঘটনাটো সংঘটিত হয় । দুৰ্ঘটনাটোত অৱশ্যে এতিয়ালৈকে কোনো লোক হতাহত হোৱাৰ খবৰ প্ৰশাসনে ৰাজহুৱা কৰা নাই। অৱশ্যে বহু সংবাদ মাধ্যমে দাবী কৰিছে যে কমেও ২০ জন লোক সন্ধানহীন হৈ আছে।
দলংখন খহি পৰাৰ ভিডিঅ' ভাইৰেল হৈ পৰিছে। ভিডিঅ’ত দেখা গৈছে জাহাজখনে খুন্দা মৰাৰ লগে লগে চকুৰ পলকতে দলংখন কেনেকৈ খহি পৰিছে। ১.৬ কিলোমিয়াৰ দীঘল দলংখনৰ সৈতে সংলগ্ন সকলো পথ বন্ধ কৰি দিয়া হৈছে। আনকি দলংখনৰ কাষেৰে জাহাজৰ চলাচলো নিষিদ্ধ কৰা হৈছে। উদ্ধাৰ অভিযান এতিয়াও চলি আছে। আমেৰিকা যুক্তৰাষ্ট্ৰৰ উপকূলৰক্ষী বাহিনী দুৰ্ঘটনাস্থলীত উপস্থিত হৈছে। বাল্টিমোৰ আৰক্ষীৰ এটা দলো ঘটনাস্থলীত উপস্থিত হৈ উদ্ধাৰ অভিযানত সহায় কৰিছে।
Continue Reading
