ডিজিটেল ডেস্ক: বাঘবৰৰ কনৰাগাঁৱত ড্ৰাগছ বিৰুদ্ধে মন্দিয়া আৰক্ষীৰ অভিযান। বহুদিন ধৰি কনৰা গাঁৱৰ আয়নাল হকৰ পুত্ৰ শ্বাহজাহান আলী (৩৬) য়ে ড্ৰাগছৰ এই ক’লা ব্যৱসায়ৰ লগত জড়িত হোৱাৰ এক অভিযোগ আছিল আৰু সেই অভিযোগৰ ভিত্তিতেই যোৱা নিশা গোপন খবৰৰ ভিত্তিত মন্দিয়া আৰক্ষীয়ে অভিযান চলায়।
ভাৰপ্ৰাপ্ত বিষয়া মাইনা দাসৰ নেতৃত্বত যোৱা আৰক্ষী দলে আয়নাল হকৰ ঘৰৰ পৰা ৩৯টা ড্ৰাগছ ভৰ্তি কণ্টেইনাৰ লগতে ২১টা খালী কণ্টেইনাৰ জব্দ কৰিবলৈ সক্ষম হয়।
বহুদিন ধৰি ড্ৰাগছ সৰবৰাহৰ লগত জড়িত আয়নাল হকৰ পুত্ৰ শ্বাহজাহান আলীক আৰক্ষীয়ে হাতে-লুটে ঘৰৰ পৰাই আটক কৰিবলৈ সক্ষম হয়। ইফালে উক্ত অঞ্চলত একাংশই দীৰ্ঘদিনে ড্ৰাগছ সৰবৰাহৰ লগত এনেদৰে জড়িত হৈ সামাজিক পৰিৱেশ বিনষ্ট কৰি অহাৰ অভিযোগ উত্থাপন হৈছে।
অৱশ্যে এই ক্ষেত্ৰত পৰৱৰ্তী সময়ছোৱাতো আৰক্ষীক আৰু অধিক কঠোৰ হোৱাৰ লগতে এনেধৰণৰ ঘাটি সমূহ বিনষ্ট কৰিবলৈ সচেতন ৰাইজে আহ্বান জনাইছে।
ড্ৰাগছ সৰবৰাহকাৰী তথা সেৱনকাৰী শ্বাহজাহান আলীৰ বিৰুদ্ধে আৰক্ষীয়ে এক গোচৰ পঞ্জীয়ন কৰি জে’ল হাজোতলৈ প্ৰেৰণ কৰাৰ ব্যৱস্থা কৰিছে। মন্দিয়া আৰক্ষীৰ এই সফলতাক এতিয়া সকলোৱে প্ৰশংসা কৰিছে।
Continue Reading
