ডিজিটেল ডেস্কঃ উত্তৰ প্ৰদেশৰ ঔৰৈয়াত এক আচৰিত তথা দুৰ্ভাগ্যজনক ঘটনা পোহৰলৈ আহিছে।
ভাইৰ বিয়াত নতুন ফোনটোৰে নিজৰ আভিজাত্য প্ৰদৰ্শন কৰিবলৈ যোৱা এজন যুৱকৰ আনন্দ নিমিষতে বিষাদলৈ পৰিণত হ’ল। চেলফি লোৱাৰ চক্ৰত যুৱকজনৰ হাতৰ পৰা পিচলি তেওঁৰ দামী iPhone 17 Pro ফোনটো এটা দ নৰ্দমাত পৰি যায়।
ঘটনাটো ঔৰৈয়াৰ সদৰ কোটৱালী এলেকাৰ তাকিয়া চৌৰাহাৰ ওচৰত সংঘটিত হৈছে। কানপুৰৰ পৰা নিজৰ সম্পৰ্কীয় ভাইৰ বিয়াত অংশগ্ৰহণ কৰিবলৈ অহা এজন যুৱকে বিয়াৰ মাত্ৰ এদিন পূৰ্বে এই নতুন আইফোনটো কিনিছিল। বিয়াৰ সমদল আগবঢ়াৰ সময়ত যুৱকজনে নতুন ফোনটোৰে চেলফি ল’বলৈ চেষ্টা কৰিছিল, কিন্তু হঠাতে হাতৰ পৰা পিছলি ফোনটো পথৰ কাষৰ এটা দ আৰু লেতেৰা নৰ্দমাত পৰি যায়।
ফোনটো ইমানেই দামী আছিল যে যুৱকজনে নিজৰ সাজ-পাৰ বা বিয়াৰ আনন্দৰ কথা পাহৰি পোনে পোনে নৰ্দমাটোত জাঁপ দিয়ে। বৰযাত্ৰীৰ মাজত নৃত্য-গীত চলি থকাৰ বিপৰীতে যুৱকজনে নৰ্দমাৰ পানী আৰু বোকাত ফোনটো বিচাৰি চলাথ কৰে। এই দৃশ্য দেখি বিয়াত অহা আন লোক আৰু স্থানীয় ৰাইজৰ মাজত ব্যাপক কৌতুহলৰ সৃষ্টি হয়।
এজন প্ৰত্যক্ষদৰ্শীয়ে জানিবলৈ দিয়া মতে, ''এদিন আগতে কিনি অনা দামী ফোনটো হেৰুৱাই যুৱকজন একেবাৰে অসহায় হৈ পৰিছিল। তেওঁ কেইবাঘণ্টা ধৰি নৰ্দমাৰ লেতেৰা পানীৰ মাজত ফোনটো বিচাৰিছিল ।
যুৱকজনে নৰ্দমাত ফোন বিচাৰি থকা অৱস্থাৰ এটা ভিডিঅ’ কোনো পথচাৰীয়ে মোবাইলত বন্দী কৰি ছচিয়েল মিডিয়াত আপলোড কৰে। বৰ্তমান এই ভিডিঅ’টো ইন্টাৰনেটত তীব্ৰ গতিত ভাইৰেল হৈ পৰিছে। যুৱকজনৰ এই দুৰ্ভাগ্যজনক অৱস্থাক লৈ বিভিন্ন ধৰণৰ ধেমেলীয়া মন্তব্যও আগবঢ়াইছে।
অৱশেষত, বহু সময় ধৰি বিচাৰ-খোচাৰ কৰাৰ পিছতো ফোনটো নোপোৱাত যুৱকজনে হতাশ হৈ নৰ্দমাৰ পৰা উঠি আহিবলৈ বাধ্য হয়। লাখটকীয়া ফোনটো নোপোৱাৰ দুখত যুৱকজনৰ বাবে ভাইৰ বিয়াৰ আনন্দ ম্লান হৈ পৰে।
Continue Reading
