বাক্সাৰ বৰমাত লটাৰীৰ নামত ভয়ংকৰ প্ৰবঞ্চনা; আৰক্ষীৰ কাষ চাপিল ভাগ্যৱান বিজেতা!

ডিজিটেল ডেস্ক: পহিলা বহাগৰ দিনটোতেই কপাল ফুলিছিল বহু ভাগ্যৱানৰ। অনলাইনত টিকট কাটি লাভ কৰিছিল বিলাসী বাহন। ভাগ্য পৰীক্ষা কৰি লাভ কৰা বিলাসী বাহন নিবলৈ বহু হেঁপাহৰে কেইবাজনো আহিছিল বাক্সাৰ বৰমালৈ।

কোনোবা আহিছে গুৱাহাটীৰ পৰা, আন কোনো আহিছে বৰপেটা, বঙাইগাঁও, গোৱালপাৰাৰ পৰা। পিছে বৰমালৈ আহি আশাত চেঁচাপানী পৰিল ভাগ্যৱানকেইজনৰ। পহিলা বহাগৰ দিনটোতেই অনলাইন প্ৰবঞ্চনাৰ বলি হৈ মূৰে-কপালে হাত দিছে বিজেতাকেইজনে।

অনলাইন মাধ্যমত বৰমা বাৰোৱাৰী দুৰ্গা পূজাৰ নাম লৈ দুষ্টচক্ৰই অনুষ্ঠিত কৰিছিল উপহাৰ কুপনৰ খেল। এই খেলৰ উপহাৰ হিচাপে আছিল ইনোভা, স্ক'ৰপিঅ', থাৰকে ধৰি বহু বিলাসী বাহন।

একেখন থাৰেই লাভ কৰিছে বৰমালৈ বৰ হেঁপাহৰে উপহাৰ ল'বলৈ অহা ৫ জনকৈ ভাগ্যৱানে।

অৱশেষত উপায়ন্তৰ হৈ বৰমা আৰক্ষীৰ কাষ চাপিল ভাগ্যৱানসকল। উল্লেখ্য যে সময়ে সময়ে বৰমা বাৰোৱাৰী দুৰ্গা পূজাৰ নাম লৈ দুষ্টচক্ৰই অনুষ্ঠিত কৰে উপহাৰ কুপনৰ খেল।

এই সন্দৰ্ভত পূৰ্বেই বৰমা আৰক্ষীত অভিযোগ দাখিল কৰিছিল বৰমা বাৰোৱাৰী দুৰ্গা পূজা সমিতিয়ে।

ৰাজ্যত এতিয়াও এইদৰে চলি আছে ভুৱা উপহাৰ কুপনৰ খেল। এনেদৰে অনলাইন টিকট বিক্ৰী কৰা দুষ্টচক্ৰক নাকী লগাব কোনে? 

দুষ্টচক্ৰক গ্ৰেপ্তাৰ কৰি কঠোৰতকৈও কঠোৰ শাস্তিৰ দাবী কৰিছে ৰাইজে।