ডিজিটেল ডেস্ক: বাংলাদেশত বৃহৎ ৰাজনৈতিক পৰিৱৰ্তন দেখিবলৈ পোৱা গল। ২০২৪ চনত প্ৰাক্তন প্ৰধানমন্ত্ৰী শ্বেখ হাছিনাৰ শাসনৰ অন্ত পেলোৱা বৃহৎ গণ বিদ্ৰোহৰ পিছত অনুষ্ঠিত প্ৰথমটো নিৰ্বাচন তাৰিক ৰহমানৰ নেতৃত্বাধীন বাংলাদেশ নেচনেলিষ্ট পাৰ্টীয়ে শুকুৰবাৰে জয়লাভ কৰে৷
২০২৪ চনৰ গণ বিদ্ৰোহৰ পিছত অনুষ্ঠিত প্ৰথমটো নিৰ্বাচনত তাৰিক ৰহমান নেতৃত্বাধীন বাংলাদেশ নেচনেলিষ্ট পাৰ্টীয়ে বৃহৎ জয় সাব্যস্ত কৰিবলৈ সক্ষম হৈছে।
অৱশ্যে নিৰ্বাচন আয়োগে চূড়ান্ত ফলাফল সন্দৰ্ভত আনুষ্ঠানিক ঘোষণা কৰা নাই যদিও বি এন পিৰ মিডিয়া চেলে X পোষ্টত দলটোৰ বিজয়ৰ দাবী কৰি কয়, “বাংলাদেশ নেচনেলিষ্ট পাৰ্টী চমুকৈ বি এন পিয়ে সংখ্যাগৰিষ্ঠ আসনত জয়লাভ কৰাৰ পিছত চৰকাৰ গঠন কৰিবলৈ সাজু হৈছে ।”
নিৰ্বাচন আয়োগৰ এগৰাকী মুখপাত্ৰৰ মতে, কেইবাখনো আসনৰ ফলাফলৰ প্ৰক্ৰিয়া এতিয়াও চলি আছে আৰু কেইঘণ্টামানৰ পিছতে ফলাফল ঘোষণা হোৱাৰ সম্ভাৱনা আছে ।
আনহাতে, একাধিক সংবাদ মাধ্যমৰ হিচাপত দেখা গৈছে যে ৩০০ আসনৰ সংসদত বি এন পিয়ে ১৫১ খনতকৈ অধিক আসন লাভ কৰিছে । ২০২৪ চনৰ আগষ্ট মাহত আৱামি লীগ শাসনৰ পতনৰ পিছত দায়িত্ব লোৱা অন্তৰ্ৱৰ্তীকালীন প্ৰশাসনৰ ঠাইত নতুন নিৰ্বাচিত চৰকাৰখনে বাংলাদেশৰ শাসন ক্ষমতা লাভ কৰিব।
বাংলাদেশৰ ত্ৰয়োদশ সংসদীয় নিৰ্বাচনত বাংলাদেশ নেচনেলিষ্ট পাৰ্টীৰ ঐতিহাসিক জয়ৰ পিছত ভাৰতৰ প্ৰধানমন্ত্ৰী নৰেন্দ্ৰ মোদীয়ে বাংলাদেশৰ প্ৰধানমন্ত্ৰী পদৰ দাবীদাৰ তাৰিক ৰহমানক উষ্ম অভিনন্দন জনায়। ছ’চিয়েল মিডিয়াত শ্বেয়াৰ কৰা বাৰ্তাত প্ৰধানমন্ত্ৰী মোদীয়ে এই বিজয়ক বাংলাদেশৰ জনসাধাৰণৰ নেতৃত্বৰ প্ৰতি থকা অদম্য বিশ্বাসৰ প্ৰমাণ বুলি অভিহিত কৰে।
প্ৰধানমন্ত্ৰী মোদীয়ে লিখিছে, "সংসদীয় নিৰ্বাচনত BNPক নিৰ্ণায়ক জয়ৰ দিশত আগবঢ়াই নিয়াৰ বাবে তাৰিক ৰহমানক আন্তৰিকতাৰে অভিনন্দন জনাইছো। এই বিজয়ে আপোনাৰ নেতৃত্বৰ প্ৰতি বাংলাদেশী জনসাধাৰণৰ আস্থা প্ৰতিফলিত কৰিছে।"
তেওঁ আৰু কয় যে ভাৰতে গণতান্ত্ৰিক, প্ৰগতিশীল, আৰু সৰ্বাংগীন বাংলাদেশৰ সমৰ্থনত থিয় দিব আৰু দুয়োখন দেশৰ ভাগ-বতৰা উন্নয়নৰ লক্ষ্যসমূহ শক্তিশালী কৰাৰ বাবে একেলগে কাম কৰিবলৈ আগ্ৰহী।
শ্বেখ হাছিনাক পদচ্যুত কৰাৰ পিছত বাংলাদেশত এয়াই আছিল প্ৰথমটো বৃহৎ নিৰ্বাচন। ১৭ বছৰীয়া নিৰ্বাসনৰ পিছত তাৰিক ৰহমানৰ দলটো ক্ষমতালৈ ঘূৰি অহাটো দক্ষিণ এছিয়াৰ ৰাজনীতিত এক বৃহৎ টাৰ্নিং পইণ্ট হিচাপে পৰিগণিত হৈছে। এই অভিনন্দন বাৰ্তাৰ জৰিয়তে ভাৰতে নতুন চৰকাৰৰ সৈতে শক্তিশালী দ্বিপাক্ষিক সম্পৰ্কক অগ্ৰাধিকাৰ দিব বুলি স্পষ্টভাৱে ইংগিত দিছে।
Continue Reading
