ডিজিটেল ডেস্কঃ মহম্মদ ইউনুছে মন্তব্য কৰে যে শ্বেখ হাছিনাৰ চৰকাৰ পতনৰ পিছত বাংলাদেশত চলি থকা ‘অৰাজকতা’ আচলতে ‘ষড়যন্ত্ৰ’। বাংলাদেশৰ অন্তৱৰ্তীকালীন চৰকাৰৰ ভৱিষ্যত মুৰব্বী ইউনুছে বৃহস্পতিবাৰে পেৰিছৰ পৰা বাংলাদেশলৈ উভতি আহে। ইয়াৰ পিছত তেওঁ দেশৰ পৰিস্থিতিৰ বিষয়ে সেই মন্তব্য কৰে। একে সময়তে নোবেল বঁটা বিজয়ী ৮৪ বছৰীয়া অৰ্থনীতিবিদগৰাকীয়েও সেই ষড়যন্ত্ৰৰ পৰা কেনেকৈ মুক্তি পাব পাৰি সেই কথাও ক’লে।
ইউনুছে বৃহস্পতিবাৰে নিশা বাংলাদেশৰ অন্তৱৰ্তীকালীন চৰকাৰৰ মুৰব্বী হিচাপে শপত গ্ৰহণ কৰাৰ কথা। তাৰ আগতে ইউনুছৰ বিমান দুপৰীয়া বাংলাদেশৰ শ্বাহজালাল বিমানবন্দৰত উপস্থিত হয়। বিমানবন্দৰৰ পৰা ওলাই আহি সংবাদ মাধ্যমৰ সন্মুখীন হ’ল ইউনুছে। তাতেই তেওঁৰ সেই মন্তব্য শুনা গৈছিল। বাংলাদেশৰ সংবাদ মাধ্যম "কলবেলা"ই তেওঁলোকৰ প্ৰতিবেদনত প্ৰকাশ কৰিছে ইউনুছৰ বক্তব্য।
ইউনুছে কয়, “যোৱা কেইদিনমানত দেশত যিবোৰ হিংসাত্মক ঘটনা সংঘটিত হৈছে সেইবোৰ ষড়যন্ত্ৰ। এই ষড়যন্ত্ৰ বন্ধ কৰিব লাগিব। হিংসা বিয়পোৱা সকলক ন্যায়ৰ কাষ চাপিব লাগে। কোনো ধৰণৰ প্ৰতিশোধমূলক ব্যৱস্থা গ্ৰহণ কৰা নহ’ব। যদি মোৰ ওপৰত আপোনাৰ আস্থা আৰু বিশ্বাস আছে তেন্তে সেয়া নিশ্চিত কৰিব লাগিব। কাকো আক্ৰমণ কৰিব নোৱাৰি। গোলমাল কৰিব নোৱাৰি। দেশৰ চৰকাৰৰ ওপৰত মানুহৰ আস্থা নাই। সেই আস্থা ঘূৰাই দিব লাগিব। আৰু তাৰ বাবে প্ৰথমে দেশত চলি থকা হিংসা বন্ধ কৰিব লাগে।’’
একে সময়তে দেশবাসীলৈ প্ৰেৰণ কৰা বিশেষ বাৰ্তাযোগে ইউনুছে কয় যে যদিহে আক্ৰমণ আৰু বিশৃংখলতা অব্যাহত থাকে, তেন্তে তেওঁক যি দায়িত্ব ল’বলৈ অনুৰোধ কৰা হৈছে, সেই দায়িত্ব তেওঁ আৰু নাথাকিব।
বৃহস্পতিবাৰে বাংলাদেশলৈ উভতি অহাৰ পিছত ইউনুছকো অলপ আৱেগিক যেন লাগিছিল। সংবাদ মাধ্যম "কলবেলা"ই তেওঁলোকৰ প্ৰতিবেদনত লিখিছে, ইউনুছে কান্দোনৰ মাতেৰে কোৱা শুনা যায়, "আজি মই আবু ছাইদক মনত পেলাইছো।" সেই ঘটনা আৰু তেওঁৰ ছবি বাংলাদেশৰ সীমাৰ সিপাৰে সমগ্ৰ বিশ্বতে বিয়পি পৰিল। কিছুদিন পিছত প্ৰতিবাদকাৰী ছাত্ৰ-ছাত্ৰীসকলে হাছিনাৰ পদত্যাগ দাবী কৰিবলৈ আৰম্ভ কৰে।
Continue Reading
