ডিজিটেল ডেস্কঃ ৱেষ্ট ইণ্ডিজ ভ্ৰমণলৈ গৈ ইটোৰ পিছত সিটোকৈ দুঃসংবাদে স্পৰ্শ কৰি গৈছে ভাৰতীয় শিবিৰ। প্ৰথমতে, কে এল ৰাহুল কৰ’নাত আক্ৰান্ত হোৱাৰ বাবে কেৰিবিয়ানৰ বিৰুদ্ধে টি-২০ ছিৰিজৰ পৰা বাহিৰ হ’ল। এইবাৰ কেৰিবিয়ানৰ বিৰুদ্ধে আঘাতৰ বাবে অনিশ্চিত ৰবীন্দ্র জাদেজা৷ আঁঠুৰ আঘাতৰ বাবে আগন্তুক মেচসমূহত অনিশ্চিত অলৰাউণ্ডাৰ জাদেজা। এই শৃংখলাত তেওঁক অৰ্পন কৰা হৈছিল সহ অধিনায়কৰ দায়িত্ব। পিছে বাওঁ আঁঠুৰ আঘাতৰ বাবে খেলুৱৈগৰাকীলৈ বিশ্ৰামৰ পৰামৰ্শ চিকিৎসকৰ।
ৱেষ্ট ইণ্ডিজৰ বিৰুদ্ধে প্রথমখন এদিনীয়া খেলৰ পূর্বে ভাৰতৰ অধিনায়ক শিখৰ ধৱনে জাদেজাৰ আঘাত সন্দর্ভত সংবাদমেলত কয়, ‘তেওঁৰ আঘাত আছে। গতিকে তেওঁ মেচখন খেলিব পাৰিব নে নাই আমি নাজানো! ইয়াৰ বাহিৰেও আমাৰ হাতত আছে ছিৰাজ, আমাৰ হাতত আছে প্ৰসিদ্ধ কৃষ্ণ, আৰু আছে একাধিক ভাল বলাৰ। আমাৰ বলিং ইউনিটটো যথেষ্ট ভাল। তেওঁলোকে নিশ্চিতভাৱে ভাল প্ৰদৰ্শন আগবঢ়াব।’
ইফালে, শুকুৰবাৰে ৱেষ্ট ইণ্ডিজৰ বিৰুদ্ধে অনুষ্ঠিত প্ৰথম এদিনীয়াত জয়ী হৈছে ভাৰত। মেন অৱ দ্য মেচৰ খিতাপো লাভ কৰিছে শিখৰ ধৱনে। ৰাহুল আৰু জাদেজাৰ দৰে নিৰ্ভৰযোগ্য খেলুৱৈ দলৰ পৰা বাদ পৰাৰ পাছতো এই জয়ে স্বাভাৱিকতে আত্মবিশ্বাসী কৰি তুলিব ভাৰতক।
Continue Reading
