বব ডিলানৰ বিৰুদ্ধে যৌন নিৰ্যাতনৰ অভিযোগ

ৱাশ্বিংটনঃ আমেৰিকা যুক্তৰাষ্ট্ৰৰ কিংবদন্তি সংগীতজ্ঞ-গীতিকাৰ বব ডিলানৰ বিৰুদ্ধে যৌন নিৰ্যাতনৰ অভিযোগ উত্থাপিত হৈছে। এগৰাকী মহিলাই নিউয়ৰ্কৰ আদালতত বব ডিলানৰ বিৰুদ্ধে যৌন নিৰ্যাতনৰ গোচৰ তৰিছে। অভিযোগ অনুসৰি, মহিলাগৰাকীক ৫৬ বছৰৰ পূৰ্বে অৰ্থাৎ ১৯৬৫ চনত আমেৰিকা যুক্তৰাষ্ট্ৰৰ খ্যাতনামা শিল্পী তথা লোক-কিংবদন্তী বব ডিলানে যৌন উত্পী্ড়ন চলাইছিল। তেতিয়া মহিলাগৰাকীৰ বয়স আছিল ১২ বছৰ। বব ডিলানে ১৯৬৫ চনৰ এপ্ৰিলৰ পৰা মে’ মাহৰ ভিতৰত অভিযোগকাৰীক প্ৰায় ৬ সপ্তাহ ধৰি যৌন নিৰ্যাতন চলোৱাৰ গুৰুতৰ অভিযোগ উত্থাপন কৰিছে মহিলাগৰাকীয়ে।

মহিলাগৰাকীৰ দাবী, নিউয়ৰ্কৰ বিখ্যাত ‘চেলছী হোটেল’ৰ এটা বিলাসী এপাৰ্টমেণ্টত তেওঁক যৌন নিৰ্যাতন কৰা হৈছিল। ইফালে ৫৬বছৰৰ পূৰ্বৰ এই দাবী সমূলি মিছা বুলি এক বিবৃতিত বব ডিলানৰ মুখপাত্ৰই সদৰী কৰিছে। ৮০ বছৰীয়া বব ডিলানক সৰ্বকালৰ সৰ্বশ্ৰেষ্ঠ কণ্ঠশিল্পী আৰু গীতিকাৰ বুলি গণ্য কৰা হয়। এতিয়ালৈকে, তেওঁৰ মুঠ ১২৫ নিযুত এলবাম বিশ্বজুৰি বিক্ৰী হৈছে। তেওঁক ২০১৬ চনত সাহিত্যৰ ‘নবেল বঁটা’ প্ৰদান কৰা হৈছিল। তেনে পৰিপ্ৰেক্ষিতত তাৰকা শিল্পীগৰাকীৰ বিৰুদ্ধে শেহতীয়া অভিযোগে অনুৰাগী মহলক হতচকিত কৰি তুলিছে। পৰৱৰ্তী সময়ত ন্যায়ালয়ে গোচৰটি সন্দৰ্ভত কেনে ব্যৱস্থা গ্ৰহণ কৰে, সেয়াহে হ’ব লক্ষ্যণীয়!