বৈভৱ সূৰ্যবংশীৰ পিতৃ-মাতৃক ইংলেণ্ড-আয়াৰলেণ্ড ভ্ৰমণৰ অনুমতি

ডিজিটেল ডেস্ক: বিচি চি আইৰ সচিব দেৱজিৎ শইকীয়াই ভাৰতীয় ক্ৰিকেটৰ বাবে কেইবাটাও গুৰুত্বপূৰ্ণ ঘোষণা কৰিছে। ইয়াৰ মূল উদ্দেশ্য হৈছে ১৫ বছৰীয়া প্রতিভাৱান খেলুৱৈ বৈভৱ সূৰ্যবংশীৰ সুবিধাৰ বাবে তেওঁৰ পিতৃ-মাতৃক ইংলেণ্ড আৰু আয়াৰলেণ্ড ভ্রমণলৈ লৈ যোৱাৰ অনুমতি প্রদান কৰা, আগন্তুক আই পি এল আগতীয়াকৈ আৰম্ভ কৰাৰ ইংগিত দিয়া আৰু বৈভৱক খেলত গুৰুত্ব দিবলৈ পৰামৰ্শ দিয়া।

বি চি চি আইৰ সচিবগৰাকীয়ে নিশ্চিত কৰে যে ১৫ বছৰীয়া খেলুৱৈ বৈভৱক ছিনিয়ৰ দলৰ পৰিৱেশত অভ্যস্ত কৰিবলৈ আৰু তেওঁৰ সুবিধাৰ বাবে তেওঁৰ পিতৃ-মাতৃক আগন্তুক ইংলেণ্ড আৰু আয়াৰলেণ্ড ভ্রমণত লগত যাবলৈ অনুমতি দিছে। তেওঁলোকৰ যাত্ৰা আৰু থকাৰ সকলো খৰচ ব'ৰ্ডে বহন কৰিব। 

আনহাতে, শ্রীলংকাত 'শ্রীলংকা এ' খেলুৱৈৰ সৈতে হোৱা খেলপথাৰৰ হতাহতিৰ বিষয়ে মন্তব্য দি শইকীয়াই বৈভৱক নিজৰ খেলত মনোযোগ দিবলৈ আৰু অন্যান্য অশান্তিকৰ বিষয়বোৰ আওকাণ কৰিবলৈ পৰামৰ্শ দিয়ে। তেওঁ লগতে কয় যে খেলপথাৰৰ এনে সৰু-সুৰা ঘটনাৰ মীমাংসা কৰা খেল পৰিচালক আৰু আম্পায়াৰসকলৰ কাম, ইয়াত ব'ৰ্ডৰ কোনো হস্তক্ষেপ নাথাকে। 

ইফালে বি চি চি আইৰ সচিব শইকীয়াই ইংগিত দিয়ে যে অহা ছিজনত আই পি এলৰ সময়সূচী আগুৱাই আনিব পাৰে, য'ত ১০ মাৰ্চৰ পৰা ১৫ মে'ৰ ভিতৰত খেলসমূহ অনুষ্ঠিত হোৱাৰ প্ৰস্তাৱ আছে। গ্ৰীষ্মকালৰ প্ৰচণ্ড গৰম আৰু বৰষুণৰ প্ৰভাৱৰ পৰা খেলুৱৈ তথা দর্শকসকলক সুৰক্ষিত ৰখাৰ উদ্দেশ্যে এই পৰিৱৰ্তনৰ চিন্তা কৰা হৈছে। উৎস: দৈনিক জনমভূমি