ডিজিটেল ডেস্কঃ বিয়াৰ আগতে নিজকে আৰু অধিক ধুনীয়া কৰি তুলিবলৈ মন কৰিছিল এগৰাকী কইনাই৷ সেয়ে মেক-আপ কৰোৱাবলৈ তেওঁ গৈছিল বিউটি পাৰ্লাৰলৈ৷ কিন্তু বিউটি পাৰ্লাৰত কইনাৰ মুখত ঘঁহি দিয়া প্ৰসাধনসামগ্ৰীয়ে কইনাৰ মুখৰ গঢ়েই সলাই পেলালে৷ প্ৰসাধন লগোৱাৰ পিছতে কইনাৰ মুখখন ফুলি উঠিল, হৈ পৰিল কুৰূপা। কইনাৰ এনে অৱস্থাৰ কথা জানিব পাৰি ভাবী দৰাই কইনাৰ ঘৰলৈ গ’ল আৰু কইনাৰ ৰূপ দেখি ইছ ইছ বুলি ক’বলৈ ধৰিলে৷
ঘটনাটো কৰ্ণাটকৰ হাছান জিলাৰ আৰাচিকেৰ গাঁৱত সংঘটিত হৈছে। মুখমণ্ডল সম্পূৰ্ণ ৰূপে জ্বলি যোৱা কইনা বৰ্তমান স্থানীয় চিকিৎসালয়ত চিকিৎসাধীন হৈ আছে।কইনাৰ মুখখন জ্বলি যোৱা দেখি দৰাই সেইগৰাকী কইনাক বিয়া কৰিবলৈ অস্বীকাৰ কৰে। ফলত হ’বলগীয়া বিয়া খন সকলো প্ৰস্তুতিৰ পিছতো ভাগি যায়৷ কইনাৰ পৰিয়ালে ইতিমধ্যে বিউটি পাৰ্লাৰ খনৰ বিৰুদ্ধে আৰক্ষীত অভিযোগ দাখিল কৰিছে।
কইনাগৰাকীয়ে অভিযোগ কৰিছে যে গংগা নামৰ বিউটিচিয়ানগৰাকীয়ে তেওঁৰ মেক আপ কৰিছিল৷তেওঁৰ মুখত প্ৰসাধন সামগ্ৰী ঘঁহা হৈছিল আৰু গৰম ভাপ দিবলৈ আৰম্ভ কৰিছিল। কইনাই অভিযোগ কৰিছে যে গৰম বাষ্পৰ বাবে তেওঁৰ মুখখন জ্বলি যায়৷
কইনাৰ পৰিয়ালে গঙ্গাৰ বিৰুদ্ধে আৰক্ষী চকীত অভিযোগ দাখিল কৰিছে আৰু আৰক্ষীয়ে তেওঁক ফোন কৰি সোধা-পোছা কৰিছে বুলি জানিব পৰা গৈছে৷
Continue Reading
