ডিজিটেল ডেস্কঃ চীনে নিজৰ নতুন উদ্ভাৱনেৰে মানুহক স্তম্ভিত কৰি ৰাখে। এই সময়তে চীনে পুনৰবাৰ পেমেণ্ট প্ৰযুক্তিৰ ক্ষেত্ৰত মানুহক আচৰিত কৰি তুলিছে। আচলতে পাকিস্তানী ক্ৰিকেটাৰ ৰানা হামজা ছাইফে নিজৰ ইনষ্টাগ্ৰাম হেণ্ডেলৰ পৰা এটা ভিডিঅ’ পোষ্ট কৰিছে যিটো যথেষ্ট ভাইৰেল হৈ পৰিছে। এই ভিডিঅ'টোত দেখা গৈছে যে কেনেকৈ চীনত কেৱল হাত জোকাৰি পেমেণ্ট কৰা হয়।
এই ভিডিঅ'টোত ক্ৰিকেটাৰ হামজা আৰু তেওঁৰ বন্ধুসকলে এখন গেলামালৰ দোকানলৈ যায় য'ত তেওঁলোকক ‘পাম পেমেণ্ট চিষ্টেম’ৰ বিষয়ে দেখুওৱা হৈছিল। এই ভিডিঅ'টো চীনৰ জুঝৌ চহৰত বনোৱা হৈছে। ভিডিঅ’টোত কোৱা হৈছে যে যদি কোনো হাতৰ তলুৱা পঞ্জীয়ন কৰা হয় তেন্তে তেওঁ চীনৰ যিকোনো ঠাইতে হাতৰ তলুৱা জোকাৰি পেমেণ্ট কৰিব পাৰে।
উল্লেখযোগ্য যে কেৱল ছাইফৰ ভিডিঅ'টোৱেই নহয়, ইয়াৰ আগতেও ‘পাম পেমেণ্ট চিষ্টেম’ৰ বহু ভিডিঅ' ভাইৰেল হৈছিল। ইয়াৰ পূৰ্বে আৰ পি জি গ্ৰুপৰ অধ্যক্ষ হৰ্ষ গোৱেংকাইও নিজৰ এক্স হেণ্ডেলত একেধৰণৰ ভিডিঅ’ পোষ্ট কৰিছিল। সেই ভিডিঅ’টোত এগৰাকী মহিলাই বেইজিং মেট্ৰ’ত হাতৰ তলুৱাৰে ধন দি মানুহক আচৰিত কৰি তুলিছিল। মহিলাগৰাকীয়ে তেওঁলোকক জনাইছে যে চীনত নগদবিহীন ধন পৰিশোধ কৰাটো অতি দ্ৰুতগতিত বিয়পি পৰিছে। ইয়াত মানুহে QR code আৰু face recognition technology ব্যৱহাৰ কৰি আছে। এতিয়া হাতৰ তলুৱাৰ জৰিয়তে ধন পৰিশোধ কৰাটোও ৰাইজৰ মাজত দ্ৰুতগতিত বিয়পি পৰিছে।
চীনে নিজৰ নতুন উদ্ভাৱনেৰে সমগ্ৰ বিশ্বক আচৰিত কৰি তুলিছে। একে সময়তে চীনে ডিজিটেল পেমেণ্টৰ ক্ষেত্ৰত অতি দ্ৰুতগতিত আগবাঢ়িছে। চীনৰ পৰা আৰম্ভ কৰি সমগ্ৰ বিশ্বতে বিয়পি পৰে ধন পৰিশোধ কৰাৰ নতুন পদ্ধতি।
Continue Reading
