ডিজিটেল ডেস্ক: ডিফেণ্ডিং চেম্পিয়ন পাকিস্তানে আইচিচি চেম্পিয়নছ ট্ৰফীত পৰাজয়েৰে অভিযান আৰম্ভ কৰিছে। বুধবাৰে অনুষ্ঠিত প্রতিযোগিতাখনৰ উদ্বোধনী খেলখনত আয়োজক পাকিস্তানক ৬০ ৰানত সহজেই পৰাজিত কৰে নিউজিলেণ্ডে।
প্রথমে বেট ধৰি ৫ উইকেটত ৩২০ ৰান কৰা নিউজিলেণ্ডে পৰৱৰ্তী সময়ত পাকিস্তানক ৪৭.২ অ'ভাৰত ২৬০ ৰানত সীমিত ৰাখে। খুচদিল শ্বাহ (৬৯) আৰু বাবৰ আজমে (৬৪) অর্ধ শতৰানৰ ইনিংছ খেলিলেও পাকিস্তানে পৰাজয়বৰণ কৰে। পাকিস্তানৰ ইনিংছত ছালমান আঘাই ৪২ আৰু ফখৰ জামানে ২৪ ৰান কৰে।
ইয়াৰ আগেয়ে অ'পেনাৰ উইল ইয়ং আৰু মিডল অর্ডাৰৰ বেটাৰ টম লাথামৰ শতৰানৰ জৰিয়তে পোনতে বেট ধৰি নিউজিলেণ্ডে ৫ উইকেটত ৩২০ ৰান কৰিছিল। দলীয় স্ক'ৰ ৭৩ ৰানত আগশাৰীৰ তিনিটা উইকেট হেৰুৱালেও ইয়ং আৰু লাথামে শতৰান গোটাই নিউজিলেণ্ডৰ ইনিংছ মজবুত স্থিতিলৈ তুলি নিয়ে।
ডেভন কনৱে (১০), কেন উইলিয়ামছন (১) আৰু ডাৰিল মিচেল (১০) ব্যর্থ হ'লেও ইয়ং আৰু লাথামৰ বেটিং বিক্ৰমৰ জৰিয়তে নিউজিলেণ্ডে ৫টা উইকেটত ৩২০ ৰানৰ শক্তিশালী স্ক'ৰ থিয় কৰে। গ্লেন ফিলিপছেও ৬১ ৰানৰ গুৰুত্বপূৰ্ণ অৱদান যোগায়। ইয়ঙে ১১৩টা বলত ১২টা চাৰি আৰু ১টা ছয়েৰে নিজৰ ১০৭ ৰানৰ ইনিংছটো সজায়। আনহাতে, লাথামৰ ১০৪টা বলত অবিজিত ১১৮ ৰানৰ ইনিংছটোত সমাহাৰ ঘটে ১০টা চাৰি আৰু তিনিটা ছয়ৰ। পাকিস্তানৰ নঈম শ্বাহ আৰু হেৰিছ ৰৌফে দুটাকৈ উইকেট দখল কৰে।
Continue Reading
