ডিজিটেল ডেস্ক: মহাৰাষ্ট্ৰৰ নৱনিৰ্বাচিত মুখ্যমন্ত্ৰী দেবেন্দ্ৰ ফাড়নবিছৰ শপত গ্ৰহণ অনুষ্ঠানত ৰাজনৈতিক নেতাসকলৰ লগতে বহুকেগৰাকী বলিউডৰ তাৰকাইও অংশগ্ৰহণ কৰে। এই অনুষ্ঠানত অংশগ্ৰহণ কৰি নেটিজেনৰ ৰোষত পৰিছে শ্ৰদ্ধা কাপুৰ৷ অভিনেত্ৰীগৰাকীক শপত গ্ৰহণ অনুষ্ঠানত দেখাৰ পিছত একাংশ নেটিজেনে ২০১৯ চনৰ এটা ঘটনাক লৈ সৰৱ হৈ পৰিছে।
২০১৯ চনত দেবেন্দ্ৰ ফাড়নবিছ বিজেপি শাসিত মহাৰাষ্ট্ৰৰ মুখ্যমন্ত্ৰী থকাৰ সময়ত প্ৰশাসনে মুম্বাইৰ এটা প্ৰকল্পৰ বাবে ৩০০০ গছ কাটিবলৈ উদ্যোগ লৈছিল। আৰু প্ৰশাসনৰ এই প্ৰকল্পৰ বিৰুদ্ধে শ্ৰদ্ধা কাপুৰ সৰৱ হৈ পৰিছিল। হাতে হাতে প্লেকাৰ্ড লৈ বিৰোধ প্ৰদৰ্শন কৰিছিল বহু লোকে অভিনেত্ৰীগৰাকীৰ টি-চাৰ্টতো পৰিলক্ষিত হৈছিল প্ৰতিবাদৰ বাৰ্তা। ২০২০ত উদ্ধৱ থাকৰে মুখ্যমন্ত্রী নির্বাচিত হোৱাত সেই বিশেষ প্রকল্পটোৰ কাম বন্ধ কৰে৷ এই সিদ্ধান্তৰ বাবে উদ্ধৱ থাকৰেক প্ৰশংসা কৰিছিল অভিনেত্ৰীগৰাকীয়ে৷
শেহতীয়াকৈ দেবেন্দ্ৰ ফাড়নবিছৰ শপত গ্ৰহণত অভিনেত্ৰীগৰাকীয়ে অংশগ্ৰহণ কৰাৰ পাছত পুনৰ ভাইৰেল হৈ পৰিছে এই পুৰণি ঘটনাটোৰ ভিডিঅ’। সেইলৈ বৃহস্পতিবাৰে দক্ষিণ মুম্বাইৰ আজাদ ময়দানত শপত গ্ৰহণ অনুষ্ঠানত শ্ৰদ্ধাৰ উপস্থিতি সন্দৰ্ভত প্ৰশ্ন উত্থাপিত হৈছে। ২০১৯ চনত শ্ৰদ্ধা কাপুৰে তেওঁৰ ছবি ‘ছাহো’ৰ প্ৰচাৰৰ বাবে গছ কটাৰ প্ৰতিবাদত যোগদান কৰিছিল বুলি সমালোচিত হৈছে।
নেটিজেনসকলে সমালোচনা কৰি কয় যে প্ৰকল্পটোৰ বিৰুদ্ধে প্ৰতিবাদ কৰা অভিনেত্ৰী গৰাকীয়ে এই উদযাপনত অংশগ্ৰহণ কৰিছে। সেই একে সুবিধাৰ আশাত শপত গ্ৰহণ অনুষ্ঠানটোলৈ তেওঁ কিমান নিৰ্লজ্জভাৱে অংশগ্ৰহণ কৰিছে বুলিও সমালোচিত হৈছে৷
উল্শলেখনীয় যে শপত গ্ৰহণ অনুষ্ঠানত জাহ্নৱী কাপুৰ,ছলমান খান, শ্বাহৰুখ খান, ৰণবীৰ সিং, ৰণবীৰ কাপুৰ, মাধুৰী দীক্ষিত নেনে, বৰুণ ধৱন, অৰ্জুন কাপুৰ আদি বলিউডৰ তাৰকা উপস্থিত থাকে।
Continue Reading
