ছিকিমত ভয়াৱহ ভূমিস্খলন; প্ৰাণ হেৰুৱালে অৰুণাচলৰ শ্ৰমিকে

ডিজিটেল ডেস্ক: ছিকিমত ভূমিস্খলনে লৈছে ভয়াৱহ ৰূপ৷ প্ৰকৃতিৰ ৰুষ্টৰূপে ছিকিমত প্ৰাণ কাঢ়িলে এগৰাকী শ্ৰমিকৰ৷ ভূমিস্খলনত প্ৰাণ গ’ল অৰুণাচল প্ৰদেশৰ বাসিন্দা কালু তামাঙৰ৷ মৃত্যুৰ সময়ত তেওঁৰ বয়স আছিল ৩৫ বছৰ৷

ছিকিমত শ্ৰমিক হিচাপে কৰ্মৰত অৰুণাচল প্ৰদেশৰ কালু তামাঙৰ মঙলবাৰে ভূমিস্খলনত মৃত্যু হয়। ভূমিস্খলনটো এটা এজি নিৰ্মাণ কোম্পানী এলেকাত (মেছ ৰুম) সংঘটিত হৈছিল আৰু দুজন শ্ৰমিক গেংটক-নাথুলা ঘাইপথৰ ১৭ মাইলৰ ওচৰত ভূমিস্খলনৰ ধ্বংসাৱশেষৰ তলত আৱদ্ধ হৈ পৰিছিল।

আন দুজন শ্ৰমিকক উদ্ধাৰ কৰা হৈছিল আৰু উন্নত চিকিৎসাৰ বাবে গেংটকৰ এছ টি এন এম চিকিৎসালয়লৈ প্ৰেৰণ কৰা হৈছিল। ভাৰতীয় সেনা, বন বিষয়া আৰু শ্বেৰথাং আৰক্ষী থানাই চলাইছিল যুটীয়া উদ্ধাৰ অভিযান৷

পৰৱৰ্তী সময়ত কৰ্মৰত সকলো শ্ৰমিককে ভূমিস্খলন সংঘটিত এলেকাৰ পৰা নতুন স্থানলৈ স্থানান্তৰ কৰা হৈছে বুলি, ছিকিম আৰক্ষীয়ে এক প্ৰতিবেদনযোগে সদৰী কৰিছে৷